Bıyl úsh oblys kúnbaǵys alqabyn ulǵaıtty

ASTANA, QazAuparat - Bıyl úsh oblys kúnbaǵys alqabyn arttyryp jibergen. Bul týraly Aýyl sharýashylyǵy mınıstri Erbol Qarashókeev Úkimet otyrysnyda málim etti, dep habarlaıdy QazAqparat tilshisi.

«Bıyl ákimdikterdiń deregi boıynsha jalpy egis alańy 23,4 mln gektar boldy. Bul 2022 jylǵy deńgeıden 68,6 myń gektar kóp. Onyń ishinde jazdyq egis alqaby – 20,9 mln gektar.

Dándi daqyldar 15,6 mln ga alańǵa egildi, egis tolyǵymen aıaqtaldy.

Maıly daqyldar alańy boıynsha jospar 3,3 mln gektar bolatyn. Ol jsopardyń 97,4%-y oryndaldy. Ótken jylmen salystyrǵanda maıly daqyldar alqaby Soltústik Qazaqstan oblysy boıynsha 50 myń gektarǵa, sondaı-aq Aqmola oblysy boıynsha 17,4 myń gektarǵa jáne Abaı oblysy boıynsha 12,4 myń gektarǵa ulǵaıtyldy. Aqtóbe oblysynda maıly daqyldar alqaby boıynsha josparly kórsetkishterge qol jetkizilmedi. Al Batys Qazaqstan oblysynda josparlanǵan ósimniń ornyna 37,5 myń gektarǵa qysqardy», - dedi Erbol Qarashókeev.

Onyń aıtýynsha, bıyl qant qyzylshasynyń aýdany 19 myń gektarǵa deıin jetkizildi.

«Kartop egý tolyǵymen aıaqtaldy, egis alqaby 6,7 myń gektarǵa ulǵaıtylyp, 197,5 myń gektarǵa jetti, onyń 2 myń gektary Soltústik Qazaqstan oblysynda.

Qant qyzylshasynyń aýdany 19 myń gektarǵa deıin jetkizildi, bul 2022 jylǵy deńgeıden 7,4 myń gektarǵa kóp, egis aıaqtaldy», - dedi mınıstr.