Bıyl úsh qaladaǵy jastar páterlerin alady - Marhabat Jaıymbetov

NUR-SULTAN. QazAqparat – Jyl sońyna deıin elimizdiń iri úsh qalasyndaǵy jumys isteıtin jastar jalǵa beriletin páterlerin alady. Bul týraly Parlament Májilisindegi Úkimet saǵatynda aıtyldy, dep habarlaıdy QazAqparat tilshisi.

«Bıyl jastarǵa páter berý bastalǵaly jatyr. Jyl sońyna deıin jalǵa beriletin turǵyn úıler tapsyrylady. Osy oraıda bul páterlerge úmitkerlerden ótinimder túsip jatyr. Bul turǵyda úsh qalanyń ákimdigi tarapynan da tıisti qadamdar jasalýy kerek. Aldaǵy jyly da osy bastama aıasynda jaqsy nátıje bolady», - dedi QR Aqparat jáne qoǵamdyq damý mınıstri Dáýren Abaev.

Óz kezeginde QR IIDM Qurylys jáne turǵyn úı kommýnaldyq sharýashylyq isteri komıtetiniń tóraǵasy Marhabat Jaıymbetov Nur-Sultan, Almaty jáne Shymkent qalalarynda jastarǵa turǵyn úılerdi paıdalanýǵa berý qarasha men jeltoqsan aılarynda júrgiziletindigin jetkizdi.

«Atalǵan qalalar ákimdikteri málimetinshe, eki aıdyń ishinde jastar tıesili páterleriniń kiltin alatyn bolady», - dedi M. Jaıymbetov.

Budan buryn, D. Abaev 2022 jyldan bastap Qazaqstannyń barlyq óńirinde jastarǵa jaldamaly páter salý múmkindigi týraly málim etken edi.

Aıta ketsek, Jastar jylyna oraı Elbasynyń tapsyrmasymen QR Aqparat jáne qoǵamdyq damý mınıstrligi memlekettik organdarmen birlese otyryp, Nur-Sultan, Almaty jáne Shymkent qalalarynda jumysshy jastarǵa turǵyn úıdi berý boıynsha erejelerdi bekitken bolatyn. Atalǵan tapsyrmany QR Tuńǵysh Prezıdenti N.Á.Nazarbaev 2019 jyldyń 23 qańtarynda Jastar jylynyń ashylý saltanatynda bergen edi.

Belgili bolǵandaı, 5-10 qarasha aralyǵynda elordada jumys isteıtin jastardan satyp alý quqyǵynsyz jaldamaly páter boıynsha ótinish qabyldanady.

Jalǵa beriletin turǵyn úıge 29 jasqa tolmaǵan, jalpy bilim beretin mektepterdiń, tehnıkalyq jáne kásiptik, orta bilimnen keıingi, joǵary jáne joǵary oqý ornynan keıingi bilim berý uıymdarynyń oqý josparlaryn meńgergen jáne eńbek qyzmetin júzege asyratyn azamattar ótinish bere alady. Sonymen qatar, naryqta suranysqa ıe 100 mamandyqtyń tizimine sáıkes, kásipti ıgergen azamattar, jas otbasylar, jas kásipkerler, bıýdjettik uıymdardyń qyzmetkerleri basym sanattarǵa jatady.

Nur-Sultanda bıyl bir jáne eki bólmeli 1050 páter beriledi (30-70 sharshy metrge deıin). Qurylys basqarmasynyń málimeti boıynsha, jastarǵa 202 eki bólmeli jáne 848 bir bólmeli páter tapsyrylady.