Bıyl Ulttyq biryńǵaı testileýge qansha qarajat jumsalady

NUR-SULTAN. QazAqparat – 2021 jyly Ulttyq biryńǵaı testileýdi ótkizýge 400 mln teńge jumsalady. Bul týraly QR BǴM Ulttyq testileý ortalyǵynyń dırektory Dıdar Smaǵulov málim etti, dep habarlaıdy QazAqparat tilshisi.

«Jyl saıyn Ulttyq biryńǵaı testileýdi ótkizýde eleýli somada únemdeý bolyp jatyr. Eger ótken jyldarda UBT-ny qaǵaz formatta ótkizýge 1 mlrd teńgege tarta qarajat jumsalsa, al bıyl 600 mln teńgeden astam únemdemekpiz. Jalpy, barsha shyǵyn somasyn 400 mln teńgemen jabamyz. Aldaǵy jylda bul soma tómendeteledi. Óıtkeni bıyl elektrondy formatqa aýysý úshin tıisti shyǵyndar boldy. Endi kelesi jyly qurylǵan júıege qoldaý jasaý men kommýnıkatsııa tólemderi ǵana qamtylady. Sondyqtan 2022 jyly shyǵyndar azaıady», - dedi D. Smaǵulov Ortalyq kommýnıkatsııalar qyzmetinde.

Taratylǵan málimetke qaraǵanda, memlekettik bilim grantyn taǵaıyndaý konkýrsyna qatysý úshin UBT 15 sáýirde bastalyp, 30 maýsymǵa deıin jalǵasady. Testileý alǵash ret elektrondyq formatta ótedi.

Budan buryn habarlanǵandaı, bıyl Ulttyq biryńǵaı testileý elektrondyq formatta ótedi.

Ulttyq biryńǵaı testileýdi eki márte tapsyrýǵa bolady.

Taratylǵan málimetke qaraǵanda, testileýge 4 saǵat (240 mınýt) beriledi. UBT nátıjesi boıynsha talapkerler eń joǵary 140 ball jınaı alady.

Testileý nátıjeleriUBT aıaqtalǵannan keıin birden qoljetimdi bolady.

Árbir talapker jeke kompıýterde otyryp, UBT tapsyrmalaryn oryndaıdy.