Bıyl UQK 900 mlrd teńgeden astam ekonomıkalyq shyǵynnyń jolyn kesken

NUR-SULTAN. QazAqparat – Bıyl Ulttyq qaýipsizdik komıtetiniń ekonomıkalyq qaýipsizdik qyzmeti 900 mlrd teńgeden astam ekonomıkalyq shyǵynnyń jolyn kesken, dep habarlaıdy QazAqparat tilshisi.

Ulttyq qaýipsizdik komıtetiniń 30 jyldǵyna arnalǵan derekti fılmde Ekonomıkalyq qaýipsizdik departamenti bastyǵynyń orynbasary Marat Dúısenov osyndaı derek keltirdi.

«Qylmystyq isterdi tergeý kezinde ekonomıkanyń túrli salalaryndaǵy júıelik problemalar men memlekettik retteýdiń kemshilikteri ashylady. Bizdiń áreketimizdiń bir nátıjesi retinde normatıvtik aktilerge engizilgen ózgerister men túzetýlerdi, zańnamadaǵy olqy tustardyń joıylýyn aıtýǵa bolady. Atap aıtsaq, jer qoınaýyn paıdalaný, ekologııa, salyq, keden zańnamasyna ózgerister usynylyp, engizildi. Bıyl bıologııalyq qaýipsizdik týraly zań qabyldandy», - dedi komıtet ókili.

Fılmde aıtylǵan derekke súıensek, memlekettik baǵdarlamalardy súıemeldeý aıasynda bıyldyń ózinde ǵana 900 mlrd teńgeden asatyn ekonomıkalyq shyǵynnyń joly kesilip, bıýdjetke 37,5 mlrd teńge qaıtarylǵan.

Jekelegen keden beketterinde kóleńkeli shemalar áshkere bolyp, 40 mlrd teńgeniń salyq jáne kedendik tólemderi oryndalǵan. 7 óńirde memleketke 4 mlrd teńge shyǵyn keltirgen zańsyz maınıng qurylymdary joıylǵan.

Aıta keteıik, búgin UQK-niń qurylǵanyna 30 jyl toldy.

Vıdeodan alynǵan kadr