Bıyl UBT-dan joǵary ball jınaǵan túlekterdiń sany edáýir az boldy

ASTANA. QazAqparat - 2023 jyly joǵary ball jınaǵan UBT tapsyrýshylardyń sany azdap tómendedi. Byltyr 3179 talapker 120-dan astam ball jınasa, 2023 jyly olardyń sany 2868 boldy. Ulttyq testileý ortalyǵynyń dırektory Rýslan Emelbaev UBT nátıjesi boıynsha salystyrmaly kestelerdi bólisti, dep habarlaıdy QazAqparat.

Birinshi kestede úsh negizgi pán boıynsha salystyrmaly nátıje kórsetilgen.

Bıyl «Qazaqstan tarıhy» (20 test tapsyrmasy, 2022 jyly – 15) jáne «Oqý saýaty» (15 test tapsyrmasy, 2022 jyly – 20) pánderiniń suraqtar sanyna ózgerister engizilgenin aldyn ala atap ótken jón.

Eger osy pánderdiń ortasha baldaryn salystyratyn bolsaq, onda olar bir deńgeıde qalyp otyr. Al «Matematıka saýaty» páninen nátıjeniń 0,8 balǵa jaqsarǵany baıqalady.

Ekinshi kestede beıindik pánder kombınatsııasy aıasynda jınalǵan eń joǵary/ortasha baldar týraly aqparat usynylǵan.

Málimetke sáıkes, ortasha kórsetkish 6 balǵa ósken. Ásirese «Dúnıejúzi tarıhy», «Hımııa», «Qazaq ádebıeti» jáne «Orys ádebıeti» pánderinen kórsetkishtiń jaqsarǵany erekshe baıqalady.

Bul - talapkerlerdiń jaqsy daıyndyǵy men UTO tarapynan qoldaý sharalarynyń nátıjesi.

Esterińizde bolsa, oqý jylynyń basynda testcenter.kz saıtynda tarıhtan 100 data, qazaq jáne orys ádebıetinen shyǵarmalar tizimi ornalastyrylyp, UBT-nyń ózinde talapkerlerge Mendeleev jáne tuzdar erigishtigi kesteleriniń qaǵaz nusqalary berildi.

Sondaı-aq, bıyl alǵash ret talapkerlerge ár pánniń taqyryptary boıynsha test jospary jarııalandy.

Sonymen qatar, olarǵa onlaın baıqaý synaqtary men tegin onlaın sabaqtar qoljetimdi boldy.

Ári qaraı dıagramma shekti ball jınaǵan barlyq talapkerdiń nátıjelerin kórsetedi.

Aıta keteıik, 2022 jyly – 102 myń, 2023 jyly 135 myń adam shekti baldy eńserdi. 2022 jyly jáne 2023 jyly talapkerlerdiń negizgi úlesi 50-den 89 balǵa deıin jınady.

Alaıda, 2023 jyly joǵary ball jınaǵan test tapsyrýshylardyń sany azdap tómendep otyr.

Eger 2022 jyly 3179 túsýshi 120-dan astam ball jınasa, 2023 jyly olardyń sany 2868 boldy.

Sondaı -aq, 2022 jyly eń joǵary ball 138 baldy,(postmonıtorıngten keıin 139 ball jınaǵan talapkerlerdiń sertıfıkattary joıyldy), 2023 jyly – 137 ball.

«Jazbamnyń sońynda esterińizge sala keteıin, 31 qazanǵa deıin testileýdiń beınejazbasyna taldaý júrgiziledi. Tyıym salynǵan zattardy paıdalaný nemese ereje buzý faktileri anyqtalǵan jaǵdaıda talapkerdiń UBT nátıjesi joıylady. 2022 jyly mundaı tekseristen keıin 217 adamnyń nátıjesi joıyldy», - dep atap ótti ortalyq dırektory.