Bıyl UBT-dan 137 ball jınaǵan talapker muǵalim bolýdy armandaıdy

NUR-SULTAN. QazAqparat – Ulttyq biryńǵaı testileýden 137 ball jınaǵan qaraǵandylyq mektep túlegi Ádilsamat Ábitaev qurdastaryna jetistiginiń syrymen bólisip, UBT-ny elektrondy formatta tapsyrýdyń artyqshylyǵyn aıtty, dep habarlaıdy QazAqparat tilshisi.

«Ulttyq biryńǵaı testileý – árbir túlektiń ómirindegi mańyzdy qadam. Degenmen, negizgi maqsat – UBT-ny jaqsy tapsyrý ǵana emes, bastysy – ómirde óz ornyńdy taýyp, tabysty tulǵa bolý. UBT-nyń barlyq suraǵy mektep baǵdarlamasy boıynsha daıyndalǵan. Kóptegen test suraqtaryna ońaı jaýap berýge bolady. Aýdıtorııada sizdi alańdatyp, kómek suraıtyn balalardyń bolýy da ábden múmkin. Olarǵa aıtar basty keńesim: adam balasy qandaı jaǵdaı bolmasyn, tek óz kúshine ǵana senýi tıis», – deıdi Qaraǵandy qalasyndaǵy №61 jalpy bilim beretin mekteptiń túlegi Ádilsamat Ábitaev.

Sonymen qatar ol UBT-ny elektrondy formatta tapsyrýdyń artyqshylyqtaryna da toqtalyp ótti.

«Talapkerler úshin testileý aıaqtalǵanǵa deıin jaýaptaryn ózgertip, aldyńǵy suraqtarǵa oralý múmkindigi bar. Eger buryn test tapsyrýshylar jaýap paraqtaryn boıaýǵa kóp ýaqyt jumsasa, qazir olaı emes. Buryn skanermen tekserý kezinde durys toltyrylmaǵan jaýap nusqalarynyń eseptelmeı qalýy sııaqty jaǵdaılar oryn alatyn. Elektrondyq formattyń arqasynda biz óz nátıjelerimizdi UBT aıaqtalǵannan keıin birden bildik. Meniń keıbir tanystarym testileý aıaqtalǵannan keıin birden apellıatsııaǵa berdi. Bul olardyń ýaqytyn aıtarlyqtaı únemdedi. Eń bastysy – endi túlekter eki márte baqtaryn synaı alady. Árıne, bul jańalyqty biz úlken qýanyshpen qabyldadyq», – dedi ol.