Bıyl Túrkistandy tamashalaýǵa 1,5 mln-ǵa jýyq týrıst keldi
«Túrkistanda týrızm birneshe damýy tıis. Onyń ishinde basy baǵyttar tarıhı jáne arheologııalyq. Bárimizge belgili bizdiń óńirge Qazaqstannyń búkil aýmaǵymen qosa Ortalyq Azııa jáne Túrkııadan týrıster kóptep keledi. Osyndaı artyqshylyǵymyz úshin biz mindetti túrde týrızmdi damytýymyz kerek. Ol degenimiz qoljetimdi baǵa, yńǵaıly jáne júıeli transport, qonaqúıler, túrli as máziri jáne kásibı gıdtar. Munda týrıster rýhanı azyq izdep keledi. Sol úshin de biz bar jaǵdaıdy jasaýymyz qajet. Bıylǵy jyly kıeli Túrkistan jerine 1 mln 400 myń týrıst kelgen. Bul málimetti óńirdegi tarıhı nysandarǵa satylǵan bıletterdiń negizinde aıtyp otyrmyn», – dedi Túrkistan oblysynyń ákimi Ómirzaq Shókeev OKQ-de ótken baspasóz máslıhatynda.
Odan bólek, oblys basshysy bıyl Túrkistanda 6 birdeı nysannyń paıdalanýǵa beriletinin málim etti.
«Olar oblys ákimdiginiń ǵımaraty, Medıa ortalyq, Nur-Sultan alańy, Mýzykalyq mektep, Halyqqa qyzmet kórsetý ortalyǵy jáne Olımpıadalyq rezervterge arnalǵan sport mektebi.
Sondaı-aq, qaladaǵy rýhanı-mádenı ortalyǵynda 5 nysan - Amfıteatr, Mýzykalyq sý burqaq, Shyǵys monshasy, Qabyldaý ortalyǵy, Neke saraıyn paıdalanýǵa berý josparlanýda. Budan bólek, qalalyq saıabaq, Nazarbaev alleıasy, ortalyq býlvar qurylystary qarqyndy júrgizilýde»,- dedi ol.
Aıta ketsek, keshe Ortalyq kommýnıkatsııalar qyzmetiniń alańynda Túrkistan oblysynyń áleýmettik-ekonomıkalyq damýyna arnalǵan baspasóz máslıhaty ótti.
Onda oblys ákimi Ómirzaq Shókeev Arys qalasyn qaıta qalpyna keltirý jumystary men qalanyń jaı-kúıi týraly aıtyp berdi.
Sonymen qatar, óńir basshysy bıyl Túrkistanda paıdalanýǵa beriletin turǵyn úılerge qatysty málimetpen bólisti. Odan bólek, Ó. Shókeev aldaǵy 2-3 jylda Túrkistan elimizdiń maqtanyshyna aınalatynyn aıtyp ótti.