Bıyl Túrkistan oblysynda 57 eldi mekenge gaz tartylady

ASTANA. QazAqparat – Túrkistan oblysy qurylǵan 5 jyldyń ishinde 2 mlrd dollar kóleminde sheteldik tikeleı ınvestıtsııa tartylǵan. Óńir basshysy Darhan Satybaldy ortalyq kommýnıkatsııalar qyzmetinde ótken brıfıngide osyndaı málimet keltirdi, dep habarlaıdy QazAqparat tilshisi.

«Túrkistan qalasyn rýhanı astana retinde damytý bastamasy negizgi kapıtalǵa baǵyttalǵan ınvestıtsııa kóleminiń ósýine yqpal etti. 5 jylda ınvestıtsııa kólemi 3 ese artyp, oblys ekonomıkasyna jalpy 3 trln teńgedeı ınvestıtsııa tartyldy. Negizgi kapıtalǵa baǵyttalǵan ınvestıtsııanyń basym bóligi jeke kózderden tartyldy. 5 jylda oblysqa salynǵan tikeleı sheteldik ınvestıtsııa kólemi 2 mlrd AQSh dollaryn qurady. Jalpy somasy 422 mlrd teńgeniń133 ınvestıtsııalyq jobasy iske asyrylyp, 9 347 jumys orny quryldy», – dedi Darhan Satybaldy.

Onyń sózinshe, óńirde 5 jylǵa arnalǵan 368 ınvestıtsııalyq joba josparlanyp otyr. Olardyń jalpy quny 2,8 trln teńge bolmaq.

«Osy jobalar arqyly 18,5 myń jumys orny ashylady. 2023 jyly 48 joba iske qosylyp, 1168 adam jumyspen qamtyldy. Búgingi tańda óńirde ortalyqtandyrylǵan aýyz sýmen qamtylǵan eldi mekenderdiń jalpy sany 720-ǵa jetip, qamtý deńgeıi 86,4% boldy. Bıyl 18 eldi mekenge jańadan aýyz sý qubyry salynyp, 12 eldi mekenniń tozyǵy jetken sý júıeleri jańartylady. 465 eldi mekenge gaz júrgizilip, qamtý deńgeıi 56%-ǵa jetti. Bıyl 68 nysannyń qurylysy aıaqtalyp, qosymsha 57 eldi meken tabıǵı gazǵa qosylýǵa múmkindik alady», - dedi ákim.