Bıyl Túrkistan oblysynda 2680 páter óz ıesin tapty
Búginde óńirde 79 kópqabatty turǵyn úıdiń qurylysy júrip jatyr. Jyl sońyna deıin onyń 500 páteri, ıaǵnı 35 turǵyn úı paıdalanýǵa beriledi.
Oblystyq qurylys basqarmasynyń basshysy Toqtar Ýsýbalıevtiń málimetinshe, óńirde satyp alý quqyǵynsyz arendalyq turǵyn úı qoryn qurý boıynsha aǵymdaǵy jyly memlekettik bıýdjet esebinen 2449 páterli úılerdiń qurylysy júrip jatyr. Budan ózge, ınjenerlik kommýnıkatsııalardy jetkizý boıynsha memlekettik bıýdjet esebinen 15 nysan salynýda. Bıylǵy 10 aıdyń qorytyndysy boıynsha jyldyq jospar tolyǵymen oryndalyp, 350,1 myń sharshy metr turǵyn úı paıdalanýǵa berildi.
Óńirde 2018 jyldyń jospary - 140,8 mlrd teńge bolyp belgilengen. Jospar 97,3 mlrd teńgege oryndalyp, ótken jylmen salystyrǵanda 102,6%-dy qurady. Osyndaı júıeli jumystardyń nátıjesinde óńirdegi qala-aýdandarda páter kezeginde turǵan azamattar arendalyq baspanamen qamtylyp otyr.
Máselen, Arys qalasyndaǵy «Kóktem-2» shaǵynaýdanynda 36 páterli úsh birdeı kópqabatty úı turǵyzyldy. Qazirgi tańda bul úılerdiń qurylys jumystary jospar boıynsha tolyǵymen aıaqtalyp, qabyldanǵan. Aıta ketý kerek, Arystaǵy naq osy turǵyn aýdanda, munan bólek, taǵy 36 páterli kópqabatty úsh úı salynyp jatyr. Al qala boıynsha 1397 azamat úı kezeginde tur. Saryaǵash aýdanynda ótken jyly 19,9 myń sharshy metr turǵyn úı tapsyrylǵan. Aǵymdaǵy jyldyń 10 aıynda «Nurly jer» baǵdarlamasy boıynsha 24 myń sharshy metr turǵyn úı el ıgiligine berildi. Qaplanbek oqý-tájirıbe sharýashylyǵy aýmaǵynda «Nurly jer» baǵdarlamasymen bes qabatty, 585 páterli 13 úıdi alty qurylys mekemeleri salýda. Jalpy smetalyq quny 5,3 mlrd teńgeni quraıtyn 13 úı keler jyly tolyq paıdalanýǵa beriledi.
Oblys ortalyǵy Túrkistan qalasyndaǵy «Otyrar» móltekaýdanynda memlekettik qarjy esebinen 11 kópqabatty turǵyn úı turǵyzylyp jatyr. Budan basqa arendalyq bes qabatty 60 páterli 9 turǵyn úıdiń qurylysyna memlekettik satyp alý konkýrsy ótkizilýde.