Bıyl týrıstik oryndarǵa qatynaıtyn áýekompanııalarǵa 7,2 mlrd teńge sýbsıdııa bólindi

ASTANA. QazAqparat – Týrızmdi damytý maqsatynda bıyl 23 ishki áýereıske 7,2 mlrd teńge sýbsıdııa bólindi. Ortalyq kommýnıkatsııalar qyzmetinde ótken brıfıngide Azamattyq avıatsııa komıtetiniń tóraǵasy Tımýr Lastaev osylaı málim etti, dep habarlaıdy QazAqparat tilshisi.

«Búginde marshrýttardy sýbsıdııalaý júrgiziledi. Ol birinshi kezekte týrıstik baǵyttarǵa arnalǵan. Qazirgi ýaqytty jalpy sany 23 marshrýt boıynsha sýbsıdııa beriledi. Bıyl ol úshin 7,2 mlrd teńge bólindi. Bul joba bastapqyda óńirlerdiń elordamen baılanysyn qamtamasyz etý úshin qolǵa alynǵan. Degenmen, qazir ony biz kýrorttyq oryndardy damytý maqsatynda paıdalanyp otyrmyz. Onyń ishinde, Alakól, Balqash, Aqtaý jáne Býrabaıǵa arnalǵan marshrýttar bar», - dedi komıtet tóraǵasy.

Sonymen birge, ol standarttarǵa saı kelmegeni úshin el aýmaǵynda qyzmet kórsetetin áýekompanııalarǵa 40 mln teńge aıyppul salynǵanyn aıtty.