Bıyl Transkaspıı halyqaralyq kólik dálizinen 2 mln tonna júk ótkiziledi

ASTANA. QazAqparat – 2025 jylǵa deıin Transkaspıı halyqaralyq kólik dálizi arqyly júk ótkizý 10 mln tonnaǵa jetedi. Bul týraly eldiń áleýmettik-ekonomıkalyq máseleleri jónindegi keńeıtilgen keńeste Úkimet basshysy Álıhan Smaıylov aıtty, dep habarlaıdy QazAqparat tilshisi.

Premer-Mınıstrdiń aıtýynsha, Transkaspıı halyqaralyq kólik baǵytyn damytý boıynsha jumystar jalǵasyp jatyr.

«Byltyr júk kólemi 2 esege ósip, 1,7 mln tonnaǵa jetken. Ázerbaıjan, Túrkııa jáne Grýzııa qabyldaǵan jol kartalaryn iske asyrý nátıjesinde Transkaspıı halyqaralyq kólik dálizinen bıyl 2 mln tonna júk ótkiziledi. Al 2025 jylǵa deıin jalpy ótkizý qabileti 10 mln tonnaǵa deıin jetkiziledi», - dedi Álıhan Smaıylov.

Budan bólek ol týrızm salasynda quny 290 mlrd teńge bolatyn 100-den astam ınvestıtsııalyq joba iske asyrylatynyn aıtty. Osy baǵytta jáne 5,7 myń jańa jumys oryny ashylady.

Budan buryn habarlanǵandaı, Premer-Mınıstr Qazaqstan ekonomıkasynyń ósýi osy jyldyń I toqsanynda 4,9%-dy quraǵanyn aıtty.

Qazaqstannyń halyqaralyq rezervteri 94 mlrd AQSh dollaryn qurady. Atap aıtqanda, byltyrdyń basynan beri Ulttyq qordyń aktıvteri 3 mlrd dollarǵa ósip, 58 mlrd dollarǵa jetti.