Bıyl terrorızmge qatysy bar 31 sheteldik ustaldy – UQK

NUR-SULTAN. QazAqparat – QR Ulttyq qaýipsizdik komıteti tóraǵasynyń orynbasary Nurǵalı Bilisbekov 2019 jyly terrorızm men ekstremızımge qatysy bar 31 sheteldiktiń ustalǵanyn málim etti, dep habarlaıdy QazAqparat tilshisi.

«Óńirlik terrorızmge qarsy qurylymnyń aıasynda taraptardyń shekara qyzmetteri ózara baılanysta áreket etedi. Turaqty túrde jyl saıyn, ár toqsan saıyn osy qyzmetterdiń sarapshylar toby jınalyp, qajetti sheshimder shyǵarady. Jylda eń kemi bir ret shekara vedomstvolarynyń basshylary bas qosyp, otyrys ótkizedi. Otyrysta qajetti sheshim qabyldap, ol sheshimder júzege asyrylady. Bul tájirıbe «Yntymaqtastyq» degen birlesken shekara operatsııasy arqyly atqarylady. Osy 2019 jyly Qazaqstannyń shekara qyzmetkerleri izdeýde júrgen 10 sheteldikti ustap, óz elderine qaıtardy», - dep toqtaldy Nurǵalı Bilisbekov Parlament Májilisiniń jalpy otyrysynda.

Budan bólek ol UQK-nyń izdeý jumystarynyń nátıjesi týraly aıtty.

«Sonymen qatar, Ulttyq qaýipsizdik komıteti jedel izdeý jumysyn uıymdastyrady. Osy jumystyń barysynda 2019 jyly terrorızm men ekstremızımge qatysy bar 31 sheteldikti ustadyq jáne olar elderine qaıtaryldy», - deıdi QR Ulttyq qaýipsizdik komıteti tóraǵasynyń orynbasary.

Budan buryn habarlanǵandaı, Parlament Májilisiniń jalpy otyrysynda «Shanhaı yntymaqtastyq uıymynyń ekstremızmge qarsy is-qımyl jónindegi konventsııasyn ratıfıkatsııalaý týraly» zań jobasy maquldandy.

Qujatta ShYU elderiniń aýmaǵynda ekstremıstik uıymdardy kirgizbeýdiń qadamdary aıqyndaldy.