Bıyl tegin úıirmelerge bólinetin qarjy byltyrǵydan az bolmaıdy – Jeńis Qasymbek

ASTANA. QazAqparat – Astana ákimi Jeńis Qasymbek tegin úıirmelerge bólinetin aqsha byltyrǵydan az bolmaıtynyn málim etti, dep habarlaıdy QazAqparat tilshisi.

Qala basshysynyń Baıqońyr aýdany turǵyndarymen kezdesýinde tegin úıirme qyzmetin kórsetýshiler qaýymdastyǵynyń jetekshisi Qýat Erǵalıev tender ótkizetin platformany aýystyrý jumystary úıirmelerdiń ýaqytynda iske qosylýyna kedergi keltirip jatqanyn másele etip kóterdi.

«Birinshi qańtardan bastap «ArtSport» reformasynyń burynǵy qalpy kelmeske ketti. Burynǵy Mádenıet jáne sport mınıstri Dáýren Abaevtyń 15 qyrkúıektegi №265 buıryǵymen ákimdikterge platformany tańdaýǵa ruqsat berilgen. Búginde Astana boıynsha bul tender ótken joq. Tek keshe ǵana mádenıet jáne sport basqarmasy reformaǵa qatysýshylardyń bárin jınap, «Damubala» pltaformasymen úshjaqty kelisim jasaýymyz kerektigin aıtty. Sonda bárimiz túgeldeı jańa júıege kóshýimiz kerek bolyp otyr», - degen joba jetekshisi bir platformadan ekinshisine ótýge keminde eki aı ketetinin aıtty.

Ákim platforma aýystyrý jumystary kedergisiz aıaqtalsa, qajetti aqsha bólinip daıyn turǵanyn aıtyp, sendirdi.

«Men bul másele boıynsha osynyń aldyndaǵy platformanyń ókilderimen sóılestim. Mınıstrliktiń sheshimin de bilem. Aqsha týraly aıtsaq, qazir 4 mlrd teńge bólinedi. Jyl aıaǵyna deıin bólinetin soma byltyrǵydan kem bolmaıdy. Qalǵan máseleniń bárin keńinen pysyqtaý úshin sizdermen jeke kezdesý ótkizemin. Máseleni sol kezde naqty talqylaıyq», - dedi Jeńis Qasymbek.