Bıyl tegin medıtsınalyq kómekke 1,1 trln teńge bólindi
«2021 jylǵa arnalǵan satyp alý jospary boıynsha halyqqa medıtsınalyq kómek kórsetýge – 1,8 trln teńge, onyń ishinde tegin medıtsınalyq kómektiń kepildik berilgen kólemine – 1,1 trln teńge, mindetti áleýmettik medıtsınalyq saqtandyrýǵa 700 mlrd teńge qarastyrylǵan», - dedi Bolat Tókejanov Ortalyq kommýnıkatsııalar qyzmetinde ótken brıfıngide.
Bul qarajatty qor 1 363 medıtsınalyq mekemeniń kómegimen ıgermekshi.
«1 sáýirdegi jaǵdaı boıynsha, 1,46 trln teńge somasyna 1 363 medıtsınalyq qyzmet jetkizýshimen shart jasaldy. Halyqqa medıtsınalyq qyzmet kórsetý úshin tartylatyn jekemenshik jetkizýshilerdiń ósý úrdisi saqtalýda. Eger ótken jyly Qormen 635 jeke jetkizýshi jumys istese, bıyl olardyń sany 688 deıin ósti», - dedi qordyń basqarma tóraǵasy.
Onyń aıtýynsha, óńirler arasynda jekemenshik jetkizýshilerdiń eń joǵary úlesi Shymkent, Nur-Sultan jáne Almaty qalalaryna tıesili. Al aýyldy eldi mekenderde medıtsınalyq qyzmettiń sapasyn jyljymaly medıtsınalyq keshenderdi kóbeıtý arqyly kóterý kózdelip otyr.
«Aýyldyq jerlerde medıtsınalyq qyzmetterdiń qoljetimdiligin arttyrý úshin ótken jyly 100 jyljymaly medıtsınalyq keshen satyp alyndy, bıylǵy jyly barlyq aýyl turǵyndaryna 149 JMK qyzmet kórsetedi, olardyń ishinde beıindi mamandardyń konsýltatsııalaryn alýǵa, skrınıngterdi qosa alǵanda, dıagnostıkadan ótýge, zerthanalyq taldaýlar tapsyrýǵa, vaktsınatsııa jasaýǵa, aýrýhanaǵa jatqyzýǵa joldama alýǵa jáne medıtsınalyq kómektiń birqatar basqa da túrlerin alýǵa bolady. Birinshi toqsanda «jyljymaly emhanalar» dep atalatyn mobıldi medıtsınalyq keshender arqyly aýyl turǵyndaryna 231,9 mln teńgege 120 myń medıtsınalyq qyzmet kórsetildi», - dedi Bolat Tókejanov.