Bıyl «Taldyqorǵan-Óskemen» jolynyń jóndelgen bólikteri tolyq ashylady

ASTANA. QazAqparat – «Aqtóbe – Atyraý – Astrahan» dálizin damytý is-sharalary jalǵasady. Bul týraly QR Indýstrııa jáne ınfraqurylymdyq damý mınıstrligi Avtomobıl joldary komıteti tóraǵasynyń orynbasary Amangeldi Bekov málim etti, dep habarlaıdy QazAqparat tilshisi.

«Elimizdiń ońtústik-shyǵys óńirinde «Taldyqorǵan-Óskemen» (768 km) avtomobıl jolyn rekonstrýktsııalaý qarqyndy júrip jatyr. Búgingi tańda joldyń 649 shaqyrymynda kólik qozǵalysy ashylǵan», - dedi A. Bekov Ortalyq kommýnıkatsııalar qyzmetindegi baspasóz máslıhatynda.

Onyń aıtýynsha, 2023 jyly atalǵan joldyń ýchaskelerin tolyq ashý josparlanyp otyr. Jobany tolyq aıaqtaý 2024 jylǵa belgilengen.

Sonymen qatar komıtet basshysy elimizdiń batysynda «Aqtóbe – Atyraý – Astrahan» dálizin (819 km) damytý is-sharalary jalǵasyp jatqanyn aıtty.

«Bıyl «Qandyaǵash-Maqat-Atyraý» (440 km) ýchaskesin aıaqtaımyz, ol boıynsha kólik qozǵalysy tolyǵymen ashyq. Sondaı-aq, «Aqtóbe-Qandyaǵash» ýchaskeleri boıynsha qaıta jańartýdy jalǵastyramyz», - dedi ol.

Budan buryn habarlanǵandaı, 2023 jyldyń qorytyndysy boıynsha normatıvtik jaǵdaıdaǵy joldardyń úlesi respýblıkalyq jeli boıynsha 92 paıyzǵa jáne jergilikti jeli boıynsha 87 paıyzǵa deıin jetkizilmek.

Jyl aıaǵyna deıin «Ortalyq – Ońtústik» dálizi boıynsha jol ýchaskeleri ashylady.