Bıyl taǵy úsh marshrýttaǵy poıyzda áıelder vagony paıda bolady

ASTANA. QazAqparat – Byltyrdan beri elimizde 154 myń jolaýshy áıelderge arnalǵan vagonda qatynaǵan, dep habarlaıdy QazAqparat tilshisi.

Bul jóninde «Jolaýshylar tasymaly» aktsıonerlik qoǵamynyń bas dırektory Jánibek Taıjanov BAQ ókilderimen ótken brıfıngide aıtty.

«Byltyrdan beri júrip jatqan áıelder vagony jobasyna jolaýshylardan jaqsy lebizder kóp túsip jatyr. ıAǵnı, bes baǵyttaǵy poıyzdardyń quramynda tek áıel jynystylarǵa ǵana qyzmet kórsetip, solardy ǵana kirgizetin vagondar boldy. Osy joba bizde óte jaqsy júrdi. Jolaýshylardan mundaı vagondardyń sanyn keńeıtseńizder degen ótinish-tilek kóp tústi. Bıyl sol jobany taǵy da pılottyq rejımde jalǵastyramyz», - dedi ol.

Aıtýynsha, áıelder vagony taǵy úsh marshrýttyń poıyzdaryna jalǵanbaq.

«Taǵy úsh marshrýt qosylady. Buryn Almaty-Mańǵystaý, Almaty-Óskemen, Pavlodar-Túrkistan, Mańǵystaý-Semeı, Atyraý-Astana baǵyttaryndaǵy poıyzdarda bolǵan edi. Bıyl jazda Astana-Almaty, Astana-Shymkent, Almaty-Aqtóbe baǵyttaryndaǵy poıyzdarda áıelderge arnalǵan vagondar paıda bolady. Byltyrdan beri osy áıelderge arnalǵan vagondarmen 154 myńdaı jolaýshyny tasymaldadyq», - dedi Jánibek Taıjanov.