Bıyl SQO-daǵy ózen-kólderde 22 adam sýǵa ketti

PETROPAVL. QazAqparat – Soltústik Qazaqstan oblysynda bıyl sý qoımalarynda 22 adam qaza tapsa, olardyń altaýy - bala, dep habarlaıdy QazAqparat tilshisi.

Aptalyq brıfıngide SQO tótenshe jaǵdaılar departamenti mamandary bıyl sý qoımalarynda qaza tapqandar sanynyń kóbeıgenin aıtyp, alańdaýshylyq bildirdi. Jyl basynan 22 adam mert boldy, ótken jyly osy kezeńinde 9 adam sýǵa ketken.

«Qaza tapqandardyń basym bóligi sýǵa shomylý maýsymynda mert bolǵan. Negizgi sebepteri – arnaıy jabdyqtalmaǵan orynda sýǵa túsý, ishimdik ishý, balany eresektiń qaraýynsyz qaldyrý jáne qutqarý jabdyǵynsyz balyq aýlaý. Kún sýytqanymen, sý qoımalarynan keler qaýip áli de joǵary. Ózen-kólderdiń betine muz qatyp jatyr. Bir qaraǵanda qalyń bolyp kóringenimen, ol aldamshy. Kez kelgen ýaqytta muz oıylyp ketýi múmkin», - deıdi jedel-qutqarý otrıadynyń jetekshisi Marat Ábjanov.

Mamannyń aıtýynsha, bir adamnyń salmaǵyn qalyńdyǵy 7 sm deıin muz kóteredi. Birneshe adam muz ústine qalyńdyǵy 15 sm bolǵanda ǵana shyǵa alady.

«Ádette muz jaǵaǵa qaraı juqa bolady. Sondaı-aq qamys ósken jerde de abaılaý kerek. Qarańǵyda, qolaısyz aýa raıynda muz ústine shyǵýǵa bolmaıdy. Muzdyń beriktigin aıaqpen teýip tekserýge bolmaıdy. Ata-analardan suraıtynymyz, qazirgi ýaqytta balany muzǵa oınaýǵa jibermeńizder. Al oqys oqıǵa týyndaǵan jaǵdaıda birden 112 nómirine habarlasýǵa keńes beremiz», - deıdi Marat Ábjanov.

Elimizde 1 qazan men 1 qarasha aralyǵynda balyq aýlaýǵa barǵan 8 adam sýǵa ketken. Onyń bireýi – bala. Byltyr kúzde Mamlıýt aýdanyndaǵy Chıstoe kólinde bir er adam sýǵa ketti, onyń denesi tek kún jylyna tabyldy.