Bıyl ShQO-daǵy 13 aýyl ınternetke qosylady – Danıal Ahmetov
Bul týraly aımaq basshysy Kúrshim aýdanyna jumys sapary barysynda, jurtshylyqpen kezdesý kezinde aıtty.
«Turǵyndar kóptegen tabysty bıznes-jobalardy bastaýǵa múmkindik beretin Buqtyrma sý qoımasy arqyly ótetin kópirdiń qurylysyna kóp senim bildirip otyr. Aýdan halqy buny 50 jyldan astam ýaqyt boıy kútti», - deıdi Danıal Ahmetov.
Sondaı-aq kezdesý barysynda aýyzsýmen jáne ınternetpen qamtamasyz etýge baılanysty máseleler aıtyldy. Búginde aýdannyń 44 eldi mekeniniń 25-inde ınternet bar.
«Bıyl taǵy 13 aýylǵa, kelesi jyly qalǵan 6 aýylǵa tıisti jabdyq ornatylady. Budan bólek, azamattar Uranhaı jáne Marqakól týrıstik aımaqtaryna aparatyn joldardy jóndeý qajettigin jetkizdi. Kúrshim aýdany shekara mańyndaǵy aýmaqtardy damytý baǵdarlamasyna kiredi. Sonyń ishinde densaýlyq saqtaý salasyna erekshe nazar aýdarylyp otyr. Aldaǵy ýaqytta aýdandyq aýrýhanadaǵy perzenthana jóndeledi», - dedi ShQO ákimi.
Esterińizge sala ketsek, Memleket basshysy 2019 jyly Úkimetke Shyǵys Qazaqstan oblysynyń ákimdigimen birge Buqtyrma sý qoımasy arqyly kópir salý úshin qarjy bólý máselesin qarastyrýdy tapsyrǵan bolatyn.