Bıyl sheteldikterdiń qatysýymen quny 3,7 mlrd dollar bolatyn 36 joba iske asty - QR SІM

ASTANA. QazAqparat – Bıyl elimizde quny 3,7 mlrd dollar bolatyn 36 ınvestıtsııalyq joba sheteldikterdiń qatysýymen iske asyryldy. Bul týraly QR Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.

«Pandemııaǵa baılanysty álem protektsıonızmge, sanktsııalarǵa jáne saýda qarsylyǵyna baılanysty óziniń kópjaqty saýda júıesi úshin úlken synaqtarǵa tap boldy. Tıisinshe, ekonomıkalyq dıplomatııaǵa jáne sheteldik ınvestıtsııalardy tartýǵa erekshe nazar aýdarylady. Táýelsizdik jyldary Qazaqstan shamamen 400 mlrd. dollar ınvestıtsııa tartty», - dedi ol mınıstrliktiń osy jylǵy jumysyn qorytyndylaýǵa arnalǵan baspasóz máslıhatynda.

Onyń atap ótýinshe, elimizdiń Syrtqy ister mınıstrligi men Elshilikter otandyq ónimdi sheteldik naryqtarda ilgeriletýge járdemdesý, eksport-ımporttyń ózara tıimdi protsesi aıasynda jańa áriptestermen senimdi iskerlik baılanystar ornatý, Qazaqstanǵa sheteldik ınvestıtsııalardy tartý boıynsha jumys júrgizip jatyr.

«Osy jyldyń basynan beri sheteldikterdiń qatysýymen jalpy somasy 3,7 mlrd dollar bolatyn 36 ınvestıtsııalyq joba paıdalanýǵa berildi. 3,8 myńnan astam jumys orny quryldy. Bul rette osy jyldyń sońyna deıin keminde 5 joba paıdalanýǵa beriledi dep kútiledi. Ekonomıkanyń túrli salalarynda usynylǵan ınvestıtsııalyq jobalardyń jalpyulttyq pýlymen jan-jaqty jumys júrgizilip jatyr. Búgingi tańda pýl álemniń 30-dan astam elinen jalpy somasy 32,1 trln teńgege ınvestıtsııa tartatyn 932 jobadan turady jáne shamamen 130 myń jumys ornyn qurýdy kózdeıdi», - dedi Aıbek Smadııarov.