Bıyl sheteldik mıssıonerler tarapynan 10 quqyq buzýshylyq tirkeldi
«Dinı qyzmet jáne dinı birlestikter týraly» Zańnyń 8-baby 1-tarmaǵynda «mıssıonerlik qyzmetpen QR azamattary, sheteldikter jáne azamattyǵy joq adamdar tirkeýden ótkennen keıin aınalysýǵa quqyly» dep aıqyndalǵan. Búginde elimizde dinı mıssıonerlik uıymdar joq. Resmı tirkelgen barlyq dinı birlestikter senýshilerdiń dinı qajettilikterin qanaǵattandyrý maqsatynda elimizge sheteldik mıssıonerlerdi dinı qyzmet júrgizýge shaqyra alady. Din salasyndaǵy jergilikti atqarýshy organdar Zańǵa sáıkes «Mıssıonerlik qyzmetti júzege asyratyn adamdardy tirkeýdi jáne qaıta tirkeýdi júrgizý» memlekettik kórsetiletin qyzmet qaǵıdalaryna saı mıssıonerlerdi tirkeıdi jáne tirkeý (qaıta tirkeý) týraly kýálik beredi», - dep atap ótedi mınıstrlikten agenttiktiń resmı saýalyna bergen jaýabynda.
Vedomstvo málimetinshe, 2023 jyldyń ІІ toqsanynyń qorytyndysynda el aýmaǵynda 373 sheteldik mıssıoner (pravoslav, katolık, ıýdaızm, elýinshiler, adventıster, Ehoba kýágerleri jáne t.b.) tirkelgen.
«Sonymen qatar, 2022 jyly «Ákimshilik quqyq buzýshylyq týraly» Qazaqstan Respýblıkasy Kodeksiniń 490-babynyń úshinshi bóligin buzý, ıaǵnı mıssıonerlik qyzmetti tirkeýsiz (qaıta tirkeýsiz) júzege asyrý, sol sııaqty mıssıonerlerdiń dintaný saraptamasynyń oń qorytyndysy joq dinı ádebıetti, dinı mazmundaǵy aqparattyq materıaldardy jáne dinı maqsattaǵy zattardy paıdalaný, Qazaqstan Respýblıkasynda tirkelmegen dinı birlestikterdiń dinı ilimdi taratý boıynsha 19 ákimshilik quqyq buzýshylyq anyqtalsa, osy jyldyń birinshi jartyjyldyǵynda 10 ákimshilik quqyq buzýshylyq tirkeldi», - dep naqtylaıdy mınıstrlikten.