Bıyl Sherýbaı-Nura qoımasynan sý aǵyzý ádettegiden erte bastaldy

QARAǴANDY. QazAqparat - Qaraǵandy oblysynda qar qalyń jáne qystyń jyly bolýyna baılanysty bıyl sý tasqynyna daıyndyq jumystary erte bastalyp ketti. Negizgi sý qoımalaryndaǵy rezervýardy tasqyn sý aldynda bosatý úshin sý jiberiledi, dep habarlaıdy QazAqparat tilshisi.

Aımaq basshysy Jeńis Qasymbek Abaı aýdanyna jumys sapary barysynda Sherýbaı-Nura sý qoımasynyń sý torabyn baqylap qaıtty.

«Sý tasqyny kezeńine daıyndyq josparyna sáıkes, qazir sý qoımasynyń syıymdylyǵyn rezervteý úshin sý aǵyzylady. Barlyǵy shtattyq rejımde ótedi. Kóldiń deńgeıin bir metrge túsiremiz. Bıyl sý jiberý eki apta buryn bastaldy. Ótken jyly bul jumystarǵa 7 naýryz kúni kirisken bolatynbyz. Bul aýa raıyna baılanysty, óıtkeni qys jyly jáne qar kóp boldy», - dedi «Topar «MAES» JShS operatsııalyq dırektory Andreı Solovev.

Sherýbaı-Nura sý qoımasy MAES-ti tehnıkalyq sýmen, Topar kentin aýyz sýmen qamtamasyz etýge, Jartas sý qoımasynyń uńǵymalaryn qorektendirýge jáne jerdi sýlandyrýǵa arnalǵan. Munda Sherýbaı-Nura ózeninen sý aǵady.

Oblys ákimi sý torabyn aralap kórdi. Kásiporyn basshylarynyń aıtýynsha, nysannyń tehnıkalyq jaǵdaıyna qatysty eshqandaı problema joq. Sapar barysynda sýdy aǵyzýdyń eń joǵary kólemi men kestesi talqylandy.

Jeńis Qasymbek sondaı-aq Taszaımka aýylyna kireberis joldy aralap kórdi. Munda sý qoımasynan tógiletin sý keledi, jyl saıyn osy ýchaskede tasqyn júredi.

Ótken jyly úsh jerde sý ótkizgish qubyr tóselip, joldy kóterip, ol jer biliktermen bekitilgen. Biraq másele sheshilgen joq. Mamandardyń aıtýynsha, Sherýbaı-Nura ózenin qaıta jańartý jáne sanatsııalaý qajet.

Qazir jobalyq-smetalyq qujattama ázirlenýde, dep habarlady Abaı aýdanynyń ákimi Baýyrjan Asanov. Aldaǵy ýaqytta daıyn joba memlekettik saraptamadan ótedi jáne bıyl qaıta jańartýdy bastaýǵa bolady dep josparlanyp otyr.

Jeńis Qasymbek JSQ-ny ýaqytyly ázirleý jáne qaýipti sý tasqyny jaǵdaıyn joıý jóninde tapsyrma berdi.