Bıyl Shardara, Maqtaaral, Sozaq pen Báıdibektiń ákimin halyq ózi saılaıdy

TÚRKІSTAN. QazAqparat - Túrkistan oblysynda 4 aýdannyń ákimi saılanady. Bul týraly segizinshi shaqyrylymdaǵy oblystyq máslıhattyń kezekti besinshi sessııasynda sheshim qabyldandy, dep habarlaıdy QazAqparat tilshisi.

Shardara, Maqtaaral, Sozaq jáne Báıdibek aýdandarynyń ákimin saılaý 5 qarashaǵa belgilenip otyr.

Bekitilgen tártipke sáıkes aýdan ákimi bolýǵa nıetti úmitkerlerdi oblys basshysy jáne saıası partııalar usynady.

Dodaǵa jekelegen azamattar óz kandıdatýrasyn usyna alady.

Ol úshin úmitker tıisti ákimshilik aýmaqta turatyn saılaýshylardyń keminde bir paıyz qolyn jınaýy kerek.

«Buǵan deıin aýyl ákimderin halyq tikeleı saılasa, bıyldan bastap pılottyq joba retinde turǵyndar aýdan ákimin de ózderi tańdaıdy. Bul naýqan ákimdik qyzmetke kezdeısoq kadrlardyń emes, halyqqa jany ashıtyn, elge qyzmet etetin naǵyz isker azamattardyń kelýine yqpal etedi dep oılaımyn», - deıdi oblystyq máslıhat depýtaty Ǵalymjan Elshibaı.