Bıyl salyq jeńildikteri kásipkerliktiń qaı baǵyttaryna berildi
«Tótenshe jaǵdaı kezeńinde Úkimet Memleket basshysynyń tapsyrmasy boıynsha shaǵyn jáne orta bıznesti qoldaý úshin jedel sharalar qabyldady. Olar bıznestiń qarjylandyrýǵa qoljetimdiligin arttyrýdy, qosymsha salyqtyq yntalandyrýdy iske asyrýdy, bıznesti tekserýlerden shekteýdi kózdeıdi. Olar saýdadan bastap týrıstik bızneske deıin ekonomıkanyń túrli sektorlaryn qamtıdy», - dedi M. Takıev Ortalyq kommýnıkatsııalar qyzmetindegi baspasóz máslıhatynda.
Osy oraıda jyl sońyna deıin saýda oıyn-saýyq ortalyqtary, kınozaldar, teatrlar, kórmeler men sport obektileri boıynsha, sondaı-aq qoǵamdyq tamaqtaný, qonaqúı jáne týrıstik qyzmet salalarynda jumys isteıtin salyq tóleýshiler boıynsha múlik salyǵynan bosatý sharasy belgilendi.
Munymen qosa, jeke praktıkamen aınalysatyndar da (notarıýster, advokattar, sot oryndaýshylary, medıatorlar) bıyldyń 1 qazanyna deıin múlik salyǵynan bosatyldy.
«Jalpyǵa birdeı belgilengen tártippen jumys isteıtin jeke kásipkerler jyldyń sońyna deıin jeke tabys salyǵynan bosatyldy. Іri qara mal men asyl tuqymdy balapandardy qamtıtyn agroónerkásiptik keshendegi bıologııalyq aktıvterdiń ımportyna qosylǵan qun salyǵy salynbaıdy. Aýyl sharýashylyǵy ónimderin óndirýshiler aýyl sharýashylyǵy maqsatyndaǵy jerler boıynsha jer salyǵyn tólemeıdi», - dep túsindirdi vıtse-mınıstr.
Aıta keteıik, áleýmettik mańyzy bar azyq-túlik taýarlary úshin qosylǵan qun salyǵynyń mólsherlemesi 2020 jyldyń 1 qazanyna deıin 12 paıyzdan 8 paıyzǵa deıin tómendetildi.
«Mıkro, shaǵyn jáne orta bıznes sýbektileri 2020 jylǵy 1 sáýirden bastap 1 qazanǵa deıin 29 qyzmet túri boıynsha eńbekaqy tóleý qorynan salyq jáne basqa da mindetti tólemderden bosatyldy», - dedi ol.