Bıyl respýblıka aýmaǵynda 1 mln túp aǵash otyrǵyzylady

NUR-SULTAN. QazAqparat - 3 qazan kúni elimizdiń barlyq mektepterinde ekologııalyq saǵat ótkiziledi. Bul týraly QR Ekologııa, geologııa jáne tabıǵı resýrstar mınıstri Maǵzum Myrzaǵalıev aıtty, dep habarlaıdy QazAqparat tilshisi.

«3 qazanda elimizdiń barlyq mektepterinde ekologııalyq saǵat ótkizemiz. Oǵan úkimet músheleri, barlyq deńgeıdegi ákimder qatysady. Bul ekologııalyq saǵattyń basty maqsaty – balalarymyzdy ekologııalyq baǵytta tálim-tárbıe berý. Ol jylyna 3-4 ret ótkiziletin bolady. Ekologııalyq saǵatty ótkizgennen keıin balalarmen birge mektep ýchaskesinde aǵash otyrǵyzý naýqanyn ótkizemiz. Bizdiń esebimiz boıynsha osy naýqan barysynda 200 myńǵa jýyq aǵash otyrǵyzylady. Bul eń aldymen balalarymyzdy tabıǵat pen ekologııalyq ahýalǵa janashyrlyqpen qaraýǵa beıimdeý úshin júrgiziledi», - dedi mınıstr ekologııalyq kodeksti talqylaýǵa arnalǵan shara aıasynda.

Sonymen qatar, ol 12 qazan kúni aǵash egýge baǵyttalǵan respýblıkalyq aktsııanyń ótetindigin aıtty.

«12 qazan kúni biz aǵash otyrǵyzýǵa baǵyttalǵan jalpy respýblıkalyq aktsııa ótkizýdi josparlap otyrmyz. Tolyqtaı alǵan, kúzdiń sońyna deıin respýblıkada 1 mıllıonǵa deıin aǵash otyrǵyzylady dep kútemiz»,- dedi M.Myrzaǵalıev.