Bıyl profılaktıkalyq skrınıngterge 4,3 mlrd teńge bólingen

ASTANA. QazAqparat - Qazaqstanda onkologııalyq aýrýlardyń sút bezi, jatyr moıny, tik ishek, asqazan jáne óńesh, prostata beziniń qaterli isigi syndy túrleri keń taralǵan. 2018 jyly sút bezi qaterli isiginen 315 áıel kóz jumǵan. Ókpe ragy 754 adamnyń, uıqy bezi obyry 202 naýqastyń ólimine sebepshi boldy. 2019 jyly memleket profılaktıkalyq maqsattaǵy skrınıngterge 4,3 mlrd teńge bólingen. Bul týraly QazAqparat Mindetti medıtsınalyq saqtandyrý qorynyń baspasóz qyzmetine silteme jasap habarlaıdy.

«Aıta keterligi, 4 aqpan - Dúnıejúzilik onkologııalyq aýrýlarǵa qarsy kúres kúni. Bul kúndi atap ótýdegi maqsat - jurtshylyq nazaryn ǵalamdyq problemaǵa aýdarý. «Men. Men barmyn» (I Am. And I Will) degen uranmen ótetin bıylǵy is-sharalar árbirimizdi obyrǵa qarsy kúreske úles qosýǵa baǵyttalmaq» delingen baspasóz baıanynda.

Statıstıkaǵa súıensek, 2018 jyly Qazaqstanda 181 myń adam qaterli isikke shaldyqqan. Onyń 34 myń 585-ine qaýipti dıagnoz tuńǵysh ret qoıylypty. Patsıentterdiń basym bóligi Almaty qalasynyń (3996), Shyǵys Qazaqstan (3648), Qaraǵandy (3614) jáne Almaty oblystarynyń (2695) turǵyndary. Byltyr qaterli isikten 14 406 otandasymyz kóz jumǵan. Onkologııalyq aýrýlardan bolǵan ólim-jitim kórsetkishi boıynsha Shyǵys Qazaqstan (1757) jáne Qaraǵandy (1284) oblystary, sondaı-aq, Almaty qalasy (1611) kósh bastap tur.

Qazaqstanda onkologııalyq aýrýlardyń sút bezi, jatyr moıny, tik ishek, asqazan jáne óńesh, prostata beziniń qaterli isigi syndy túrleri keń taralǵan. 2018 jyly sút bezi qaterli isiginen 315 áıel kóz jumǵan. Ókpe ragy 754 adamnyń, uıqy bezi obyry 202 naýqastyń ólimine sebepshi boldy.

Sońǵy kezde álemde qaterli isikke shaldyqqandar sany artyp otyrǵany jasyryn emes. Búginde obyr ólim-jitim sany jaǵynan júrek-qan tamyry júıesinen keıin ekinshi orynǵa shyqty. Kóptegen adamdardyń bul dıagnozdy úkim retinde qabyldaıtyny ras. Biraq qazirgi zamanǵy medıtsına men ǵylym onkologııalyq aýrýlardyń basym bóligin emdeýge múmkindik berip otyr.

Ókinishke qaraı, álem ǵalymdary áli kúnge deıin qaterli isikti emdep jazatyn ámbebap dári oılap tapqan joq. Tehnologııa men medıtsınanyń damý qarqynyna qaraǵanda ol kúnderdiń de aýyly jaqyndap qalǵan bolýy ábden múmkin. Ázirge, bizdiń qolymyzdan keletini - aýrýdyń aldyn alý jáne der kezinde emdelý. Oǵan kádimgi emhanada júrgiziletin profılaktıkalyq tekserýler arqyly qol jetkizýge bolady. 2019 jyly memleket profılaktıkalyq maqsattaǵy skrınıngterge 4,3 mlrd teńge bóldi. Tegin skrınıng túrleri:

- 40 pen 70 jas aralyǵyndaǵy áıelderdi mammografııalyq tekserýden ótkizý;

- 30 ben 70 jas aralyǵyndaǵy áıelderdi jatyr moıny qaterli isigine tekserý;

- 50 men 70 jas aralyǵyndaǵy erler men áıelderdi toq ishek pen tik ishek obyryna tekserý.