Bıyl Petropavlda 650-ge jýyq beınekamera ornatylmaq

PETROPAVL. QazAqparat – Soltústik Qazaqstan oblysynda kóshedegi qaýipsizdikti qamtamasyz etip, quqyq buzýshylyqtardy anyqtaý maqsatynda jańa tehnologııalar qoldanylyp jatyr. Qazir óńirde tek beınekameralardyń ǵana 32 myńy jumys isteıdi, dep habarlaıdy QazAqparat tilshisi.

SQO polıtsııa departamentiniń bastyǵy Aıdyn Qabduldınovtyń aıtýynsha, «qoljetimdi polıtsııa» qaǵıdatyn júzege asyrý aıasynda Petropavlda halyq kóp júretin oryndarǵa «SOS batyrmasy» shuǵyl shaqyrý júıesi ornatyldy.

«Dabyl birden jedel shara qoldaný úshin Jedel basqarý ortalyǵyna túsedi. Qazir oblys ortalyǵynda osyndaı jeti dabyl túımeshesi jumys isteıdi. Olar óz nátıjesin berip jatyr. Jeti shaqyrtý tústi, sonyń biri – N. Nazarbaev kóshesinde ornalasqan «Severnyı» sýpermarketi mańynda zergerlik buıymdardy tonaýǵa qatysty. Qylmys izi sýymaı ashyldy», - deıdi Aıdyn Qabduldınov.

Polıtsııaǵa smartfonǵa ornatylǵan «102» mobıldi qosymshasy arqyly da habarlasyp, kómek suraýǵa bolady. Ol arqyly Jedel basqarý ortalyǵyna aýdıo, beınebaılanysqa shyǵýǵa múmkindik bar, sondaı-aq qylmysty nemese quqyq buzýshylyqty fotoǵa túsirip, jiberýge bolady.

Qosymsha iske qosylǵaly ony myńnan astam adam qoldanǵan. Nátıjesinde, zańdy buzǵan 513 adamǵa ákimshilik hattama toltyryldy.

«Qoǵamdyq tártipti saqtaýda beınebaqylaýdyń bereri mol. Bul – álemdik tájirıbe. Byltyr kóshe kameralarynyń kómegimen 163 qylmys ashyldy, 20 myńnan astam ákimshilik quqyq buzýshylyqtyń joly kesildi.

Qazirgi ýaqytta SQO-da 32 myń beınekamera bar, onyń 7 myńǵa jýyǵy Jedel basqarý ortalyǵynyń júıesine qosylǵan. Ulttyq jobany júzege asyrý barysynda bıyl taǵy 1 244 beınekamera osy júıege qosylmaq. Sondaı-aq, Petropavlda 643 beınekamerany ornatý josparlanǵan», - deıdi Aıdyn Qabduldınov.

Budan basqa Jedel basqarý ortalyǵyna mektep, balabaqsha, kolledjder men ýnıversıtettiń beınekameralaryn qosý jumystary júrgizilip jatyr. Osy kúnge deıin 218 nysannyń 3,5 myńnan astam beınekamerasy qosyldy.