Bıyl paıdalanylmaı jatqan 87 myń gektar jerdi qaıtardyq - BQO ákimi

ASTANA. QazAqparat – Bıyl Batys Qazaqstan oblysynda paıdalanylmaı jatqan 87 myń gektar jer qaıtaryldy. Bul týraly ortalyq kommýnıkatsııalar qyzmetinde ótken baspasóz máslıhatynda oblys ákimi Narıman Tóreǵalıev aıtty, dep habarlaıdy QazAqparat tilshisi.

«Bizdiń oblysqa keler bolsaq, 503 myń gektar jer paıdalanylmaı jatyr degen málimet bar. Osyǵan baılanysty búgingi tańda 220 myń gektar jerdi keri qaıtardyq. Qalǵan paıdalanylmaı jatqan jerlerdi qaıtarý baǵytyndaǵy jumysty jalǵastyramyz. Bıyldyń ózinde paıdalanylmaı jatqan 300 myń gektardaı jerdiń 87 myń gektaryn qaıtaryp aldyq. Bul jumys aryqaraı júrgiziledi», - dedi Narıman Tóreǵalıev BAQ ókilderiniń saýalyna oraı.

Onyń atap ótýinshe, sharýashylyqtardan paıdalanylmaı jatqan jerdi alyp qoıý basty maqsat emes. Qaıta olardyń sol jerdi ıgerýge múmkindik jasaýǵa basa mán beriledi. Túsindirý jumystary men memlekettiń naqty qoldaýynyń arqasynda qazirdiń ózinde sharýa qojalyqtary 103 myń gektar jerdi ıgere bastady.