Bıyl Pavlodarda jylý merziminen buryn berilýi múmkin
Oblystyq máslıhattyń kezekti sessııasynda oblys ákiminiń esep berýinen keıin depýtaty Vladımır Berkovskıı óńir basshysyna usynys jasady.
«Kúz - sýyq mezgil. Páterlerge jylý kesh beriledi. Vırýsologtardyń boljamy boıynsha, sýyq tııý saldary kúzde qaıta órshıtin COVID-19 ınfektsıasyn ýshyqtyra túsedi. Sondyqtan merziminen buryn páterlerdi jylýmen qamtamasyz etýdi usynamyn», - dedi Vladımır Berkovskıı.
Ábilqaıyr Sqaqov bul másele aýdandyq jáne qalalyq aýrýhanalarda qarastyrylyp jatqanyn jetkizdi.
«Bizde eki másele bar, olardyń biri – erte jylý berý. Qazir aýqymdy jóndeý júrip jatyr. Qala jáne aýdan ákimderi bul máseleni birinshi kezektegi kún tártibinde ustaıdy. Sonymen qatar, biz epıdjaǵdaı nasharlaǵan jaǵdaıda erte daıyndyq jospary sheńberinde jospar ázirledik. Onda tósek-oryndar ashýdyń barlyq kezeńderi men eshelondary naqty jazylǵan. Barlyq eskertýlerdi eskeremiz», - dedi Ábilqaıyr Sqaqov.
Esterińizge sala keteıik, buǵan deıin pavlodarlyq kópqabatty úılerdiń birazy ystyq sýsyz qalǵan. Óıtkeni 17 – 23 tamyz aralyǵynda gıdravlıka synaǵy ótkizilip jatyr.