Bıyl Pavlodar oblysyna qonystanatyn etnıkalyq qazaqtardyń sany 500-ge jetedi
Bul týraly oblystyq ákimdikte ótken áleýmettik jáne mádenı damý máseleleri týraly óńirlik máslıhat komıssııasynyń turaqty otyrysynda aıtyldy.
«Jyl basynan beri Mońǵolııa, Qytaı, Ózbekstan jáne Reseı elderinen óńirge 250 adam kelgen. Olardyń ishinde kvota almaǵan etnıkalyq qazaqtar bar. Sondyqtan barlyǵyn sáıkestendirý kerek. Bizdiń óńirge bólingen 250 kvotany tolyǵymen oryndadyq. Sondyqtan eńbek jáne áleýmettik qorǵaý mınıstrligine kvotany taǵy 250 adamǵa nemese 63 otbasyna arttyrý týraly ótinishpen júgindik»,- deıdi jumyspen qamtý jáne áleýmettik baǵdarlamalar basqarmasy basshysynyń orynbasary Helýa Qashkenova.
Jyldyń sońyna deıin tarıhı otanyna oralǵan qandastardyń sany 500 adamǵa jetedi. Helýa Qashkenovanyń aıtýynsha, kvotanyń arqasynda kóshýge sýbsıdııa jáne jyl boıy baspana jaldap turýǵa járdemaqy alý múmkindigi usynylady. Etnıkalyq qazaqtar týystarymen qaýyshý úshin keledi jáne basym bóligi Aqsý, Ekibastuz aýyldyq aımaqtary men Ýspen, Maı, Pavlodar jáne Ertis aýdandaryn tańdaıdy. Budan basqa, bıylǵy jyly oblystyń úsh qalasy men aýdandaryna Qazaqstannyń jumys kúshi mol aımaqtarynan 2175 adamdy nemese 548 otbasyn qabyldaý josparlanyp otyr.
Eske sala keteıik, etnıkalyq qazaqtardy Pavlodar oblysyna kóshirý isi 2009 jyly qolǵa alynǵan bolatyn. Qytaıdan qonys aýdarǵan oralman Adal Hamıthan traktormen Pavlodar oblysyna jetý úshin bir aptanyń ishinde 1,5 myń shaqyrymdy artqa tastap kelgen.