Bıyl Parlament 110 zań qabyldady – Máýlen Áshimbaev
«Endi sanaýly kúnderden keıin Jańa jyldy qarsy alamyz.
Shyn máninde bıylǵy jyl ońaı bolǵan joq. Pandemııa adamzattyń qalypty ómirin múldem basqa arnaǵa buryp jiberdi.
Sonyń saldarynan týyndaǵan jańa syn-qaterlerdi ár memleket óz múmkindigine qaraı eńserip keledi. Osy baǵytta elimizde Prezıdentimizdiń basshylyǵymen der kezinde shuǵyl sheshimder men naqty sharalar qabyldandy. Soǵan sáıkes Parlament jyl boıy Memleket basshysynyń bastamalaryn jáne elimizdiń strategııalyq saıasatyn zańnamalyq turǵydan qamtamasyz etý úshin aýqymdy jumys atqardy. Bul rette, Senat depýtattarynyń belsendiligin erekshe atap ótkim keledi. Jalpy, bıyl Parlament 110 zań qabyldady. Onyń 30-ǵa jýyǵyna Parlament depýtattary bastamashy boldy», - dedi M. Áshimbaev Sennattyń jalpy otyrysynda.
Osy oraıda ol ár zań jobasy Senattyń turaqty komıtetterinde jan-jaqty talqylanyp, halyqtyń pikiri men kópshiliktiń úni eskerilip otyrǵanyn atap ótti.
«Memleket basshysynyń Joldaýyn iske asyrýǵa, pandemııa saldaryn eńserýge, ekonomıkanyń ósýin qalpyna keltirýge baǵyttalǵan zańdar qabyldadyq. Azamattardyń ómir sapasyn jaqsartýǵa, quqyǵyn qorǵaýǵa, densaýlyq saqtaý, bilim berý salalaryn jetildirýge basymdyq berildi. Shaǵyn jáne orta bıznesti qoldaý, qorshaǵan ortany qorǵaý, sybaılas jemqorlyqpen kúres baǵyttary da senatorlardyń basty nazarynda boldy. Elimizde demokratııalyq protsesterdi nyǵaıtýdy kózdeıtin zańdar toptamasy da qabyldandy», - dedi Senat tóraǵasy.
«Sonymen birge aýyldyq jerlerdi damytý, shaǵyn jáne orta bızneske qoldaý kórsetý jáne ulttyq qundylyqtardy dáripteý máselelerine basa mán berdik. Bıyl Senat uıymdastyrǵan birneshe parlamenttik tyńdaýda osy baǵyttar boıynsha atqarylyp jatqan jumystar talqylandy. Taıaýda Parlamentarızm ınstıtýty qurylǵanyn da bilesizder. Bul qurylym depýtattardyń zań shyǵarý bastamashyldyǵyn jetildirýge, qoǵam men sarapshylardyń pikirin eskerýge jáne óńirlerdegi máselelerge basa mán berýge yqpal etedi dep senemiz. Osyǵan oraı Parlament bıyl el úshin aýqymdy jumys atqardy deýge tolyq negiz bar. Sondyqtan barshańyzǵa alǵysymdy bildiremin», - dedi Máýlen Áshimbaev.