Bıyl Otpan taýda Amal merekesi ótpeıdi
Onyń aıtýynsha, Mańǵystaý oblysynyń bas memlekettik sanıtar dárigeriniń qaýlysyna sáıkes, karantın talaptaryn saqtaı otyryp, shaǵyn toppen resmı shara ótkiziledi. Sharaǵa Segiz Arys Adaı urpaqtarynyń ókilderi qatysady.
«Eskishe jyl sanaýda Amal merekesiniń aıryqsha orny bar. Bul meıram jyl saıyn «Otpan» tarıhı-mádenı kesheninde birliktiń otyn jaǵýmen ótkizilip keldi. Byltyr pandemııaǵa baılanysty barlyq sharalar toqtatylǵan bolatyn. Bıyl resmı shara karantın talaptaryna sáıkes, «Segiz Arys» qoǵamdyq qory azamattarymen kelise otyryp shaǵyn toppen ótkizýdi josparlap otyrmyz. Dastarhan jaıý, dám tatý, jármeńke uıymdastyrý sharalary bolmaıdy. Al Amal merekesin ulyqtaý oblys boıynsha onlaın formada ótkiziledi. Oǵan qala, aýdan boıynsha 40 mádenıet úıi, 62 kitaphana men 6 mýzeı mekemesi tyńǵylyqty at salysady. Sonymen qatar 14-naýryz kúni Ábish Kekilbaev atyndaǵy alańda kontsert beriledi. Óńir turǵyndary úshin oblystyq telearnadan jas urpaqqa ónege beretin ulttyq naqyshtaǵy tanymdyq baǵdarlamalar tikeleı efırden shyǵady. Eń birinshi baılyq – dencaýlyq. Sondyqtan saqtyq sharalaryn ustanýǵa mindettimiz»,- dedi Pánııa Sarmýrzına.
Baspasóz konferentsııasyna Mańǵystaý oblysy sanıtarııalyq-epıdemıologııalyq baqylaý departamentiniń bólim basshysy Berdibek Saraltaev qatysty.
Onyń aıtýynsha, memlekettik bas sanıtar dárigeri men oblystyń bas sanıtar dárigeriniń qaýlysyna sáıkes, Mańǵystaýda bıyl Amal meıramy men Naýryz merekesi toılanbaıdy. Óıtkeni óńirdegi karantındik shekteýlerge baılanysty adamdardyń kóptep shoǵyrlanýyna ruqsat joq. Sondaı-aq halyqtyń tyǵyz baılanysta bolýy qaýipti indettiń órshýine ákeledi.
«Kórisý kúni qol alysyp, tós qaǵystyrady. Biraq epıdemıologııalyq turǵysynan aıtatyn bolsam, osyndaı qaýipti kezeńde qol alysý durys emes. Sondyqtan barsha mańǵystaýlyqtardy amal merekesinde úıde, óz otbasymen otyryp, qoǵamdyq oryndarǵa barmaýǵa shaqyramyn. Óıtkeni qol berip, qushaqtasý – ınfektsııanyń taraýyna sebep», - dedi Berdibek Saraltaev.