Bıyl otandyq kásiporyndar 109 myń jeńil avtokólik qurastyrady

NUR-SULTAN. QazAqparat – Bıyl otandyq kásiporyndar 109 myńǵa jýyq jeńil avtokólik qurastyrady. Bul týraly QR Indýstrııa jáne ınfraqurylymdyq damý mınıstrligi Indýstrıaldyq damý komıteti tóraǵasynyń orynbasary Oljas Saparbekov málim etti, dep habarlaıdy QazAqparat tilshisi.

«2021 jyly 93 myń avtokólik qurastyryldy. Bul 2020 jylǵy kórsetkishten 20 paıyzǵa joǵary. Osy jyldyń birinshi toqsanynda 22 239 kólik shyǵaryldy. Bul ótken jyldyń sáıkes kezeńimen salystyrǵanda 12,4 paıyzǵa artyq», - dedi ol ortalyq kommýnıkatsııalar qyzmetindegi baspasóz máslıhatynda.

Sonymen qatar ol osy jyly elimizde avtomobıl qurastyrýǵa qatysty belgilengen jospar qandaı ekenin aıtyp berdi.

«Búkil álemde avtomobıl tapshylyǵy baıqalyp otyrǵanyn atap ótkim keledi. Ózderińiz de búkil álemde logıstıkalyq tizbektiń buzylǵanyn bilesizder. Sondyqtan óndirýshiler únemi jumys júrgizip, seriktesterimen qajetti bólshekterdi jetkizýge qatysty kelissóz ótkizip jatyr. Soǵan qaramastan bıyl shamamen 109 myń jeńil avtokólik qurastyrý josparymyzda bar», - dedi Oljas Saparbekov.