Bıyl ońtústik óńirler 300 myń gektardan astam alqapqa dán septi

ASTANA. QazAqparat – Kóktemgi egis jumystary bastalǵaly beri Qazaqstannyń ońtústik óńirlerinde dıhandar 311,4 myń gektar jerge egis ekti, onyń basym bóligi dándi jáne jemshóp daqyldary, dep habarlaıdy QazAqparat QR Aýyl sharýashylyǵy mınıstrliginiń baspasóz qyzmetine silteme jasap.

Jalpy, búkil el boıynsha 23,4 mln ga jer egý josparlanyp otyr. Bıyl dándi, jemshóp, kókónis jáne baqsha daqyldarynyń egis alqaptary ulǵaıady.

Aýyl sharýashylyǵy qurylymdarynda 160 myń traktor, 5 myńnan astam joǵary ónimdi egis keshenderi, 78 myń sepkish jáne 226 myń topyraq óńdeý quraldary bar.

Kóktemgi egis naýqanyn ótkizýge óńirlerge 413 myń tonna jeńildikti dızel otyny bólingen. Bul byltyrǵydan 13 myń tonnaǵa artyq. Elimiz boıynsha aýyl sharýashylyǵy taýaryn óndirýshiler úshin dızel otynynyń ortasha quny 204 teńge/lıtrge belgilendi. Bul naryqtyq baǵadan 15-20% arzan. Búgingi tańda óńirlerge shamamen 163 myń tonna otyn jóneltildi.

Bıyldan bastap egiske bólinetin dızel otynyn maqsatsyz paıdalanýdyń jolyn kesý úshin operatorlarǵa MÓZ-den otyn jóneltýdiń elektrondyq shot-faktýralarynyń aqparattyq júıesinde jeke vırtýaldy qoıma qurylyp, sondaı-aq otynǵa arnaıy boıaý qosylmaqshy.

Bıylǵy jylǵa 700 myń tonnadan astam tyńaıtqysh engizý josparlansa, onyń 63% otandyq ammıak selıtrasy men ammofos quraıdy. Jergilikti bıýdjetterde tyńaıtqyshtardy satyp alýdy sýbsıdııalaý baǵdarlamasyna 31,3 mlrd teńge qarastyrylǵan.

«Keń dala» baǵdarlamasy boıynsha kóktemgi naýqandy qarjylandyrýǵa 140 mlrd teńge qarastyrylǵan, oǵan 3200-den astam sharýany qamtyp, 2 mln gektarǵa jýyq alqapta egis jáne egin jınaýdy qamtamasyz etý josparlanyp otyr. Qazirgi ýaqytta 149,7 mlrd teńgege 4133 ótinim kelip tústi.

Sondaı-aq, jalpy somasy 20 mlrd teńgege jýyq forvardtyq satyp alý baǵdarlamasy jalǵastyrylatyn bolady. Budan bólek, Azyq-túlik korporatsııasy iri aýyl sharýashylyǵy taýar óndirýshilerine 300 myń tonna astyq kóleminde shamamen 35 mlrd teńge somaǵa egisti satý jáne keıinnen qarjylandyrý úshin taýarlyq nesıe berýdi josparlap otyr.