Bıyl óndiristik jaraqat saldarynan 59 adam qaza tapty
13:44, 20 Mamyr 2021
NUR-SULTAN. QazAqparat – Bıyl óndiristik jaraqat saldarynan 59 adam qaza tapty. Bul týraly Eńbek, áleýmettik qorǵaý jáne kóshi-qon komıteti tóraǵasynyń orynbasary – QR Bas memlekettik eńbek ınspektory Tólegen Ospanqulov aıtty, dep habarlaıdy QazAqparat tilshisi.
«2020 jyly respýblıka kásiporyndarynda oryn alǵan qaıǵyly oqıǵalardan 1 503 adam zardap shekti. Qaza tapqandardyń sany 15,5 paıyzǵa artyp, 208 adamǵa jetti. 2019 jyly 180 adam qaza tapqan edi», - dedi Tólegen Ospanqulov Ortalyq kommýnıkatsııalar qyzmetindegi baspasóz máslıhaty barysynda.
Onyń atap ótýinshe, Qaraǵandy, Shyǵys Qazaqstan jáne Qostanaı, Pavlodar oblystaryndaǵy taý-ken metallýrgııalyq keshen kásiporyndarynda jaraqattaný deńgeıi joǵary bolyp otyr. Ótken jyly bul salada 304, al qurylys salasynda 175 adam jaraqattanǵan.
«Osy jyldyń 4 aıynda ǵana elimizdiń kásiporyndarynda 462 adam zardap shegip, onyń 59-y qaza tapty. Bul 2020 jyldyń 4 aıymen salystyrǵanda 11 paıyzǵa joǵary», - dedi Bas memlekettik eńbek ınspektory.