Bıyl óndiristik jáne turmystyq órtten 120 adam kóz jumdy - TJM

ASTANA. QazAqparat – Bıylǵy úsh aıda 2 304 órt oqıǵasy tirkeldi, dep habarlaıdy QazAqparat tilshisi.

«Úsh aıda respýblıka boıynsha 2 692 tabıǵı jáne tehnogendik sıpattaǵy tótenshe jaǵdaılar jáne oqıǵalar tirkeldi. Bul – ótken jyldyń sáıkes kezeńimen salystyrǵanda 11,8%-ǵa kóp. Olardan 396 adam zardap shekti, onyń ishinde 151 azamat adam qaza tapty. Keltirilgen materıaldyq nuqsan – 811,63 mln teńge. Ótken jyly dál osy kezeńdegi shyǵyn 763,63 mln teńge bolǵan edi», - delingen Tótenshe jaǵdaılar mınıstriliginiń saıtynda jarııalanǵan esepte.

Jalpy, tirkelgen oqıǵalardyń 96,5%-y – tehnogendik sıpattaǵy tótenshe jaǵdaılar.

«Tehnogendik sıpattaǵy jaǵdaılardyń negizgi úlesi – óndiristik jáne turmystyq órtter. Olardyń kólemi – 88,6%. 2023 jylǵy úsh aıda 2 304 órt boldy, odan 199 adam zardap shekti, 120 adam qaza tapty. Materıaldyq shyǵyn 703,59 mln teńge», - dep málim etti vedomstvodan.

Mınıstrlik dereginshe, Qaraǵandy, Shyǵys Qazaqstan, Soltústik Qazaqstan, Mańǵystaý jáne Aqmola oblystarynda órt derekteri az bolǵan. Al, qalǵan 11 óńir men 3 qalada kerisinshe jıilegen.

«2023 jylǵy úsh aıda 93 tabıǵı sıpattaǵy tótenshe jaǵdaı tirkeldi. Olardan 96 adam zardap shekti, 6 adam kóz jumdy», - dep jazylǵan qujatta.