Bıyl oqý baǵdarlamasynda qandaı ózgerister bolýy múmkin

ASTANA. QazAqparat – Oqý-aǵartý mınıstri Ǵanı Beısembaev jańa oqý jylyna oraı bilim berý baǵdarlamasyndaǵy ózgeristerge qatysty pikir bildirdi, dep habarlaıdy QazAqparat tilshisi.

«Biz Y. Altynsarın atyndaǵy akademııanyń resmı saıtyna oqý baǵdarlamasy boıynsha sarapshylardyń sheshimderin únemi ashyq jarııalaımyz. Sonymen qatar, sarapshylar ózderiniń jeke paraqshalarynda da bólisedi. Qazir mınıstrlik oqý baǵdarlamasyna qatysty túpkilikti sheshimdi áli qabyldaǵan joq. Búginde talapqa sáıkes ata-analar qaýymdastyǵymen talqylaý júrip jatyr. Sarapshylar men ǵalymdar óz sheshimderin qabyldady. Endi ol sheshimdi ata-analar jáne muǵalimder qaýymymen talqylaý qajet», - dedi Ǵanı Beısembaev Úkimet otyrysynan keıin BAQ ókilderiniń saýalyna jaýap bere turyp.

Mınıstrdiń málimdeýinshe, sarapshylar óńirlerdi aralap sheshimderdi talqylaýǵa kirisken.

«Sarapshylar 36 aptalyq oqý baǵdarlamasyn qaldyrýdy usynyp otyr, ıaǵnı 1 maýsymǵa deıin. Degenmen, qazir qoǵamdyq talqylaý júrip jatyr», - dedi ol.