Bıyl OQO-da 562 ınfraqurylym nysan jóndeledi

ASTANA. QazAqparat - 2016 jyly Ońtústik Qazaqstan oblysynda «Jumyspen qamtýdyń 2020 jol kartasy» baǵdarlamasynyń jumyspen qamtýdy, ınfraqurylymdy jáne turmystyq-kommýnaldyq sharýashylyqty damytý arqyly qarastyratyn birinshi baǵytyn iske asyrýǵa respýblıkalyq bıýdjetten 9 mlrd teńge bólindi. Osy qarajat esebinen 562 ınfraqurylymdyq nysanǵa jóndeý jumystaryn júrgizý josparlanýda, dep habarlaıdy QR Densaýlyq saqtaý jáne áleýmettik damý mınıstrliginiń baspasóz qyzmeti.

Jóndeletin ǵımarattardyń 250-i - transporttyq ınfraqurylym nysany, 97-i - bilim berý, 28-i - mádenıet, 20-y - sport, 15-i - ınjenerlik-komýnaldyq ınfraqurylym, 12-si - áleýmettik qorǵaý jáne 5-ýi - densaýlyq saqtaý nysandary.

Infraqurylymdyq jobalardyń iske asyrylýy 3 680 jumys ornyn qurýǵa múmkindik beredi, onyń ishinde 2 myńǵa jýyq adam jumyspen qamtý ortalyqtary arqyly ornalastyrylady.

Búgingi tańda 83 jobanyń iske asyrylýy bastaldy, onyń sheńberinde 1 581 adam jumysqa turdy, olardyń ishindegi 861 adam - «JQJK 2020» baǵdarlamasyna qatysýshylar.

2015 jyly «JQJK 2020» baǵdarlamasynyń birinshi baǵytyn iske asyrýǵa 13,7 mlrd teńge bólingenin, jalpy respýblıka boıynsha 588 ınfraqurylymdyq jobalar júzege asyrylyp, 8,6 myń adam jumysqa ornalastyrylǵanyn esterińizge salamyz. 2016 jyly «JQJK 2020» baǵdarlamasynyń birinshi baǵytyn iske asyrýǵa 80,1 mlrd teńge bólindi. Bul qarajat jobalardyń sany eskerile otyryp, jergilikti atqarýshy organdardyń tapsyrystary negizinde óńirler arasynda bólinedi.