Bıyl «Nurly jol» aıasynda Astanaǵa 21 mlrd. teńge qarastyryldy - B.Saparbaev

ASTANA. QazAqparat - Astanada áleýmettik mańyzdaǵy nysandardyń qurylysy tolyq júzege asyrylady. Bul týraly búgin elorda ákimdiginde turǵyndardyń áleýmettik áleýeti máselesine arnalǵan keńeste aıtyldy.

«Nurly jol» memlekettik baǵdarlamasyn júzege asyrý úshin tek bıylǵa 700 mlrd. teńgege tarta qarjy qarastyrylǵan. Onyń ishinde Astana qalasy boıynsha 21 mlrd. teńge ıgeriledi. Atap aıtqanda, baǵdarlama birqatar negizgi sharalardy qamtyp otyr», - dep toqtaldy QR Premer-Mınıstriniń orynbasary Berdibek Saparbaev.

Álemdegi ekonomıkalyq daǵdarysqa qaramastan, Qazaqstanda áleýmettik saladaǵy shyǵystar qysqarmaǵanyna toqtalǵan ol: «Tek bıylǵa áleýmettik salaǵa 4 trln. teńgege jýyq qarjy qarastyryldy. Astanada respýblıkalyq bıýdjet esebinen áleýmettik mańyzdaǵy 17 nysannyń qurylysy júrip jatyr. Prezıdenttiń tapsyrmasyna sáıkes, 2020 jylǵa qaraı mektepke deıingi uıymdarmen júz paıyzǵa qamtamasyz etý qajet», - dedi.

Onyń sózine qaraǵanda, respýblıka boıynsha 3-6 jas aralyǵyndaǵy búldirshinderdi balabaqshamen qamtý deńgeıi 79 paıyzdy qurasa, al Astanada 58 paıyzǵa jetti.

Osy problemany sheshý úshin elorda boıynsha úsh balabaqshanyń qurylysyn bastaý jáne 11 mektepke deıingi uıymnyń qurylysyn aıaqtaý kózdelgen.