Bıyl Nur Otan bastamasymen 127 myń sport sektsııasy ashylady

NUR-SULTAN. QazAqparat - Nur Otan-da partııanyń «Ózgeris joly: Ár azamatqa laıyqty ómir» saılaýaldy baǵdarlamasyndaǵy buqaralyq jáne balalar men jasóspirimder sportyn damytý bóliginiń júzege asyrylýy týraly aıtyldy, dep habarlaıdy QazAqparat partııanyń baspasóz qyzmetine silteme jasap.

Partııanyń baspasóz qyzmeti habarlaǵandaı, buǵan deıin kásibı sport klýbtaryn ustaýǵa baǵyttalǵan qarjy halyqty, eń aldymen balalardy dene shynyqtyrý jáne buqaralyq sportpen aınalysýǵa tartýǵa baǵyttalady.

«Elbasy, Partııa lıderi Nursultan Nazarbaevtyń tapsyrmasy boıynsha qabyldanǵan saılaýaldy ýádelerdi oryndaý jónindegi Jol kartasy aıasynda bul máselege basa berildi. Memleket basshysy Qasym-Jomart Toqaev Tokıoda ótken Olımpıada qorytyndysy boıynsha otandyq sportqa shuǵyl ári tıimdi reformalar júrgizý qajettigin aıta kele, buqaralyq jáne balalar sportyn damytýdyń mańyzdylyǵyna erekshe nazar aýdardy», - delingen habarlamada.

Sonymen, balalar men jasóspirim jáne balalar men jastar klýbynyń sany elimizdiń barlyq tirek aýylyn qamtı otyryp, myńǵa deıin ulǵaıtylady. Jattyqtyrýshy-ustazdardyń jalaqysy bıyldyń ózinde 1,5 esege, al 2023 jylǵa qaraı 2 esege ósedi. Dene shynyqtyrý muǵalimderine mektepte sport sektsııasyn uıymdastyrǵany jáne júrgizgeni úshin negizgi bazalyq laýazymdyq jalaqysynan 100% mólsherinde qosymsha aqy qosylady.

Osy jyldyń ózinde barlyq iri aýdan ortalyǵynda 127 myń sport sektsııasyn ashý josparlanǵan. 22 myńnan astam balalar úıirmesiniń jumysy qaıta jandanady. Árbir aýyldyq okrýgte bıyldyń ózinde 3 myń sport nusqaýshysy laýazymyn engizý kózdelip otyr.

Óńirlerde sporttyq ınfraqurylymdy damytýǵa erekshe kóńil bólinedi. Mysaly, Qostanaı oblysynyń Lısakov qalasynda alǵash ret jalpy aýdany 2 myń sharshy metrden asatyn tennıs ortalyǵy ashyldy. Almaty oblysyndaǵy Raıymbek aýdanynyń Narynqol jáne Balqash aýdanynyń Baqanas aýyldarynda árqaısysy 180 oryndyq eki dene shynyqtyrý-saýyqtyrý kesheni paıdalanýǵa berildi.

Ulttyq sport túrlerin damytýǵa da jańa serpin beriledi. Nur Otan at sporty túrlerin (báıge, kókpar, aýdaryspaq, teńge ilý, jamby atý), sondaı-aq qazaqsha kúres, qusbegilik, sadaq atý, toǵyzqumalaq, asyq atý, arqan tartý jáne basqa da sporttyq baǵyttardy qoldaýdy jalǵastyrady. Bıyldyń ózinde olar dene shynyqtyrý pánindegi sabaqtyń mindetti komponenti retinde engiziledi.