Bıyl Mońǵolııadan 150-deı talapker Pavlodarǵa daıyndyq kýrsyna keledi

ASTANA. QazAqparat - S.Toraıǵyrov atyndaǵy PMÝ-diń «Foundation» fakýltetine túsý úshin Mońǵolııanyń Baıan-Ólgeı jáne Qobda aımaqtarynan bıyl 150-ge jýyq talapker kelýge nıet bildirýde, dep habarlaıdy pavlodarnews.kz .

Bul týraly S.Toraıǵyrov atyndaǵy PMÝ-degi «Foundation» fakýltetiniń dekany Sáýle Kisembaeva aıtty. «Jýyrda ǵana PMÝ-dan arnaıy delegatsııa shyǵyp, Mońǵolııada turatyn qazaqtarmen kezdesip qaıttyq. Maqsatymyz - jastardy elge tartý. Baıan-Ólgeı jáne Qobda aımaqtarynda turatyn qandastarymyzdyń arasynda júrgizgen úgit-nasıhat jumystarynyń nátıjesinde Qazaqstanǵa kelip oqyǵysy keletin 150 balany tizimge aldyq. Endi olar tamyz aıynda qazaq tili jáne matematıka pánderinen ótetin irikteý emtıhanyna qatysady. Joǵary upaıǵa ıe bolǵandar PMÝ-dyń «Foundation» fakýltetine túsedi. Іrikteý emtıhanyn QR Bilim jáne ǵylym mınıstrligine qarasty ulttyq testileý ortalyǵynyń ókilderi alady. Daıyndyq kýrsynda bir jyl oqyǵan soń keshendi testileýge qatysyp, joǵary oqý oryndaryna joldama alady», - deıdi Sáýle Kisembaeva.

S.Toraıǵyrov atyndaǵy Pavlodar memlekettik ýnıversıtetiniń ókilderi Reseıdiń Omby oblysynda jáne Qyrǵyzstan respýblıkasynda turatyn qazaqtarmen de kezdesip, jastaryn qazaq elinen bilim alýǵa úgit-nasıhat júrgizip qaıtqan. Biraq bul eki eldegi qandastarymyzdan bıyl naqty qansha bala keletini belgisiz. Sonymen qatar, aldaǵy ýaqytta Qytaıǵa barýdy josparlap otyr.

Eske sala keteıik, ótken jyly PMÝ-dyń daıyndyq kýrsyna Qytaı, Mońǵolııa jáne Ózbekstan elderinen 75 stýdent kelip, qazir joǵary oqý oryndaryna túsýge daıyndalýda.