Bıyl memlekettik satyp alýǵa qatysty 18 myńnan astam shaǵym tústi – Aýdıt komıteti

ASTANA. QazAqparat – Bıyl 9 aıdyń ishinde 32 myńǵa jýyq memlekettik satyp alý boıynsha zańbuzýshylyq anyqtaldy. Bul týraly QR Qarjy mınıstrligi ishki memlekettik aýdıt komıtetiniń tóraǵasy Erjan Myńjasarov málim etti, dep habarlaıdy QazAqparat tilshisi.

«Bıyl 9 aıdyń qorytyndysy boıynsha jalpy somasy 10 trln teńgege jýyq memlekettik satyp alý boıynsha 475 myńnan astam rásim beınebaqylaý kamerasymen qamtyldy. Sonyń nátıjesinde 32 myńǵa jýyq memlekettik satyp alý rásimi boıynsha zańbuzýshylyq anyqtaldy. Onyń ishinde 30 myńǵa jýyq is oryndaldy», - dedi Erjan Myńjasarov OKQ-de ótken brıfıngte.

Komıtet basshysynyń aıtýynsha, memlekettik satyp alý boıynsha jurtshylyqtyń pikiri men ótinishi erekshe mánge ıe.

«Halyq únine qulaq asý maqsatynda «Elektrondyq shaǵym» fýnktsıonaly arqyly shaǵym qaldyrýdyń ońaılatylǵan jáne tıimdi tetigi engizildi. Shaǵymdar tizilimi ashyq ári barlyǵyna qoljetimdi. Demek, baqylaýshy organdar ǵana ǵana emes, jurtshylyq ta baqylaı alady. Aıta ketsek, bıyl 9 aıdyń ishinde memlekettik satyp alýdy uıymdastyrýshylardyń áreketsizdigine qatysty 18 856 shaǵym qaraldy», - deıdi ol.

Spıkerdiń málimetinshe, joǵaryda atalǵan shaǵymnyń 51,6%-y ishinara nemese tolyq qanaǵattandyryldy.

«Osylaısha, biz bıznes ókilderiniń zańdy múddeleri men konstıtýtsııalyq quqyqtaryn qorǵaýdamyz. Memlekettik satyp alý júıesi turaqty negizde jetildirilip jatyr. Atap aıtsaq, elektrondyq taýarlar dúkeni engizildi. Sondaı-aq, kameraldyq baqylaýdyń sapasyn baqylaýdy júrgizý tásili qaıta qaraldy. Qazirgi ýaqytta sapany baqylaý úzdiksiz tásil arqyly júrgiziledi. Sonymen qatar, kameraldyq baqylaý nátıjesiniń sapasyn baqylaý qorytyndysyn oryndaýdyń mindetti tártibi belgilendi. Buǵan deıin usynymdyq sıpatta bolǵan», - dedi E. Myńjasarov.

Aıta ketsek, buǵan deıin komıtet basshysy ishki memlekettik aýdıtqa qatysty zańbuzýshylyqtar týraly aıtqan edi.