Bıyl memlekettik satyp alý salasyna «ómirlik tsıkl quny» uǵymy engiziledi

ASTANA. QazAqparat – Bıyl memlekettik satyp alý salasynda ónimniń satyp alynǵan kezinen bastap tutynyp bolǵannan keıin kádege jaratýǵa deıingi qunyn bildiretin «ómirlik tsıkl quny» uǵymy engiziledi, dep habarlaıdy QazAqparat tilshisi.

Qarjy mınıstri Erulan Jamaýbaevtyń aıtýynsha, bul memlekettik satyp alý kezinde sapaly taýarǵa qol jetkizýge múmkindik beretin tetik bolmaq.

«Búgingi tańda memlettik satyp alýdy júrgizýdiń barlyq rásimderi avtomattandyrylǵan. Básekelestikti damytýǵa jáne satyp alý protsesterin jeńildetýge baǵyttalǵan birqatar zańnamalyq sharalar qabyldandy», - dedi ol mınıstrliktiń keńeıtilgen alqa májilisinde.

Úkimet basshysynyń málimeti boıynsha, qurylys-montajdaý jumystary men jobalaýdy satyp alýǵa reıtıngtik-baldyq júıe paıdalanyla bastaǵan.

Sondaı-aq, satyp alýdyń ashyqtyǵyn qamtamasyz etýge baǵyttalǵan elektrondyq dúken engizilgeni aıtyldy. Bul rette bir kózden satyp alýǵa negiz bolatyn 7 sebep alynyp tastalsa, 8 sebep qaıta qaralǵan.

«Satyp alynatyn taýarlar, jumystar men kórsetiletin qyzmetter sapaly bolý úshin bıyldan bastap satyp alýdyń «ómirlik tsıkl quny» deıtin jańa tásil engiziledi», - dedi Erulan Jamaýbaev.