Bıyl memlekettik bıýdjetke 6,1 trln teńge somasynda kiris kirdi
«Memlekettik bıýdjetke 6,1 trln teńge somasynda kiris tústi nemese jospar 104,6 paıyzǵa oryndaldy. Respýblıkalyq bıýdjetke 4 trln teńge kiris kirdi. Jospar 92,3 paıyzǵa atqaryldy. Atqarylmaǵan bóligi 336 mlrd teńgeni qurady. Atap aıtqanda, salyqtar boıynsha jospardyń 369 mlrd teńgege oryndalmaýy negizinen korporatıvtik tabys salyǵynyń, shıki munaıǵa eksporttyq kedendik bajdyń jáne qosymsha qun salyǵynyń esebinen qalyptasty», - dedi ol.
Mınıstrdiń atap ótýinshe, korporatıvtik tabys salyǵy boıynsha jospardyń oryndalmaýy 2023 jyldyń 4 aıynda 258 iri salyq tóleýshi boıynsha málimdelgen avanstyq tólemder somasynyń ótken jyldyń osyǵan uqsas kezeńimen salystyrǵanda 33 paıyzǵa nemese 86 mlrd teńgege azaıýyna baılanysty.
Sondaı-aq, oǵan negizgi eksporttyq taýarlar baǵasynyń ortasha 12 paıyzǵa tómendeýi áser etti. Shıki munaıǵa eksporttyq kedendik baj boıynsha jospardyń negizgi oryndalmaýy eksporttyq kedendik bajdyń naqty qalyptasqan stavkasynyń boljamdy kórsetkishinen 14,7 paıyzǵa tómendeýimen baılanysty boldy.
Qosylǵan qun salyǵy boıynsha jospardyń oryndalmaýynyń sebepteri: taýar, jumys jáne qyzmetterdi ótkizý boıynsha aınalym somasynyń 13 paıyzǵa kemýi, qosylǵan qun salyǵy boıynsha qaıtarymynyń 37 paıyzǵa artýy, Eýrazııa ekonomıkalyq odaǵy elderimen ımport kóleminiń 7 paıyzǵa tómendeýi.
«Jergilikti bıýdjet kirisi 140 paıyzǵa atqaryldy jáne 2,1 trln teńgeni qurady. Jospar 607 mlrd teńgege, onyń ishinde salyq boıynsha 565 mlrd teńgege asyra oryndaldy. Kiris boıynsha jospar barlyq óńirde asyra oryndalyp otyr», - dedi Erulan Jamaýbaev.