Bıyl mektepke barǵan balalardyń 70 paıyzy qazaq synybyn tańdaǵan

ASTANA. QazAqparat - Aqparat jáne qoǵamdyq damý mınıstri Darhan Qydyráli bıyl mektepke barǵan balalardyń 70 paıyzy qazaq synybyn tańdaǵanyn aıtty, dep habarlaıdy QazAqparat.

«Ózekti» YouTube-jobasyna bergen suhbatynda mınıstr ózge salalarda da qazaq tiline suranystyń artqanyn jetkizgen.

«Bıyl mektep tabaldyryǵyn attaıtyn balalardyń 70 paıyzy qazaq synybyna barýdy tańdaǵan. Tek bilim salasynda emes, kez kelgen salada qazaq tiline suranystyń kúrt óskenin kórip otyrmyz. Jalpy, qazaq tili qazir elimizdegi túrli etnos ókilderi arasynda trendke aınaldy. Búginde ortasha eseppen aqparat salasy aýdıtorııasynyń 85 paıyzy memlekettik tildegi ónimdi tutynyp otyr. Al 14-35 jas arasyndaǵy jastar ınternet keńistikte 70 paıyzdan astam kontentti qazaq tilinde izdegen», - deıdi sala basshysy.

Aıta keteıik, búgin Darhan Qydyráli Telegramm jelisinen arna ashqanyn jazǵan bolatynbyz.