Bıyl mektep ájethanalary tolyqtaı ishke kóshiriledi

ASTANA. QazAqparat – Jyl sońyna deıin ájethanasy syrtta ornalasqan mektepterdiń máselesi sheshimin tappaq. Bul týraly Oqý-aǵartý mınıstri Ǵanı Beısembaev málim etti, dep habarlaıdy QazAqparat tilshisi.

«Búginde syrttaǵy mektep ájethanalaryn ishke kirgizý jumysy jalǵasyp jatyr. Mendegi bar aqparat boıynsha elimizde 30-ǵa jýyq mekteptiń ájethanasy dalada ornalasqan. Osy oraıda bıyl barlyq mekteptiń ájethanasyn ishke kóshirýdi aıaqtaımyz. Bul másele baqylaýda bolady», - dedi Ǵanı Beısembaev vedomstvonyń keńeıtilgen alqa otyrysynan keıin tilshilerdiń saýalyna jaýap berip.

Vedomstvo basshysynyń málimdeýinshe, búginde búkil mektep beınebaqylaý kamerasymen tolyq qamtylǵan.

«Qazir Іshki ister mınıstrligimen birlesip beınebaqylaý kameralarynyń jumysyn qadaǵalaý, materıaldardy alý jáne zertteý boıynsha birlesken jumys júrip jatyr. Sonymen qatar qaýipsizdikti qamtý maqsatynda mektep kúzetine erekshe mán berilgen. ıAǵnı kásibı kúzetke aýystyryp jatyrmyz. Atalǵan másele boıynsha jergilikti ákimdiktermen birlesip jyl sońyna deıin kásibı kúzet, týrnıket jáne dabyl túımesin ornatý tolyq sheshimin tappaq», - deıdi ol.

Buǵan deıin mınıstr elimizde balalar úıleri jabyla ma degen saýalǵa jaýap bergen edi.