Bıyl mashına jasaý salasynda 22,7% ósim boldy - Qaıyrbek Óskenbaev

NUR-SULTAN. QazAqparat – QR Indýstrııa jáne ınfraqurylymdyq damý mınıstrliginiń birinshi vıtse-mınıstri Qaıyrbek Óskenbaev óńdeý ónerkásibindegi jaǵdaıdy baıandady, dep habarlaıdy QazAqparat tilshisi.

«Bıyl 7 aıdyń qorytyndysynda elimizdiń óńdeý ónerkásibinde oń úrdis saqtaldy. Jıyntyq kórsetkish 105,9% qurady. Mashına jasaý salasynda 22,7% ósim boldy. Avtokólik quraldary, treılerler jáne jartylaı tirkemeler (+34,7%), mashınalar men jabdyqtar óndirisi (+37,8%), ózge de kólik quraldary (+37,7%), kompıýterler, elektrondyq jáne optıkalyq jabdyqtar (+45,8%), elektr jabdyqtaryn jasaý (+7,2%), jóndeý jáne ornatý (+5,4%) deńgeıi artty», - dedi Q. Óskenbaev Úkimet otyrysynda.

Onyń aıtýynsha, tústi metallýrgııada naqty kólem ındeksi 98,2% qurady. Maýsymdyq tómendeý birinshi kezekte «Qazaqmys korporatsııasynyń» Qosmuryn kenishinde óndiristiń tehnologııalyq jelisin josparly qaıta qurýǵa jáne «Qazmyrysh» jaýpkershiligi shekteýli seriktestiginde josparly kúrdeli jóndeý júrgizýge baılanysty boldy. Nátıjesinde, qorǵasyn shyǵarý (-18%), myrysh (-6%), tazartylǵan mys

(-11%), mys sozbasy (-7%) jáne tazartylǵan altyn (-3%) tómendedi.

«Sonymen qatar quıma altyn (+12%), katodty mys (+30%), mys taıaqshasy óndirisi (+1%) óskeni baıqalady. Qara metallýrgııada oń dınamıka saqtalyp, ósim

1,6% boldy. Oǵan bolat (+25%), shoıyn (+17%), armatýralyq prokat (+11%), kómirtekti bolat (+21%) jáne ferrosılıkomarganets (+29%) jáne basqa da kórsetkishterdiń ósimi esebinen qol jetkizildi», - dedi ol.