Bıyl Mańǵystaýda balyq ósiretin eki kásiporyn iske qosylady

AQTAÝ. QazAqparat - Mańǵystaýda balyq sharýashylyǵynyń áleýeti 380 000 tonnany quraıdy. Jyl sońyna deıin qýaty joǵary balyq óndiretin 2 kásiporyn ashylady dep josparlanǵan, dep habarlaıdy QazAqparat tilshisi.

Bul týraly qoǵamdyq kommýnıkatsııa ortalyǵynda ótken brıfıngte oblystyq Tabıǵı resýrstar jáne tabıǵat paıdalanýdy retteý basqarmasy basshysynyń orynbasary Esenqos Ádilbaev málim etti.

«Qarakól aýmaǵynda qýaty jylyna 30 tonnany quraıtyn toǵandy balyq sharýashylyǵyn jeke kásipker «Bólekbaev» qolǵa aldy. Qurylys jumystary qyrkúıek aıynda aıaqtalady dep josparlanýda. Sharýashylyqta 9 balyq ósiretin qazandyq bar, 12 adam jumyspen qamtylady. Al, ekinshisi - «Beluga Queen» JShS. Atalǵan mekeme «Aqtaý teńiz porty» arnaıy ekonomıkalyq aımaǵynda quny 20 mlrd teńgeni quraıtyn bekire balyǵyn óndirý boıynsha aýqymdy keshen salýdy josparlap otyr. Jylyna 50 tonna ýyldyryq beretin kásiporynnyń qýaty - 400 tonna. 100 adam jumyspen qamtylady dep josparlandy»,-dedi Esenqos Ádilbaev.

Baspasóz konferentsııasyna Mańǵystaý oblystyq ınspektsııasy balyq sharýashylyǵy basqarmasynyń basshysy Adızal Shıhmetov qatysty.

Spıker Kaspıı teńizinde anyqtalǵan brakonerlik faktilerge toqtaldy.

«2020 jyldyń 5 aıynda basqarma qyzmetkerleri 90 reıd ótkizdi. Tekseris barysynda 24 zańbuzýshylyq anyqtady. Onyń ishinde 155 kg bekire tuqymdas balyq, 1 aýlaý quraly, 3 qaıyq pen kólik quralynyń bar ekendigi málim boldy. 1 qylmystyq is qozǵalyp, jaýapty organǵa tirkeldi. Zańsyz balyq aýlap, erejeni buzǵandarǵa 393 795 teńge ákimshilik aıyppul salyndy»,-dedi Adızal Shıhmetov.

Mamandardyń aıtýynsha balyq sharýashylyǵyn damytý maqsatynda aldaǵy 10 jylda barlyǵy 60 mlrd teńgege jeke ınvestıtsııa tartý josparlǵanǵan.

Sáıkesinshe 24 sharbaqty balyq sharýashylyǵy salynyp, 100 myń tonna balyq ósiriledi.