Bıyl Mańǵystaýda 7 myńnan astam oqýshy mektep bitiredi

AQTAÝ. QazAqparat - Onyń ishinde 7114 oqýshy memlekettik jalpy orta mektepti aıaqtaǵaly otyr. Bul jaıynda oblystyq bilim basqarmasynyń mektepke deıingi jáne jalpy bilim bóliminiń basshysy Klara Qulataeva qoǵamdyq kommýnıkatsııa ortalyǵynda ótken brıfıngide málim etti, dep habarlaıdy QazAqparat.

Spıkerdiń aıtýynsha, túlekter 27 mamyr – 10 maýsym aralyǵynda 5 pánnen (algebra, qazaq tili, orys tili, Qazaqstan tarıhy, tańdaý páni) óz mektebinde qorytyndy attestatsııadan ótedi.

Joǵary oqý oryndaryna túsý úshin túlekter UBT tapsyrady.

- UBT jylyna 4 ret ótkiziledi (qańtar, naýryz, mamyr-maýsym, tamyz). Mamyr-maýsym aıynan bólek qalǵany aqyly túrde ótedi. Memlekettik bilim grantyna konkýrsqa qatysý úshin tegin testileý mamyr-maýsym aıynda ótkiziledi. Testke ótinish qabyldaý 28 sáýirde bastaldy, 14 mamyrda aıaqtalady dep josparlanǵan. Ótinish ulttyq testileý ortalyǵynyń saıtynda qabyldanyp jatyr,-dedi Klara Qulataeva.

UBT 16 mamyrda bastalyp, 5 shildede aıaqtalady. Formaty jáne pánder sany boıynsha eshqandaı ózgeris joq (3 mindetti: matematıka, oqý saýaty, Qazaqstan tarıhy; 2 beıindi pán).

Talapkerler bıyl memlekettik grantqa iligý úshin eki ret UBT tapsyrýǵa múmkindik aldy.

Abıtýrıent osy eki test nátıjesiniń birin alyp, konkýrsqa qatysa alady. Alaıda, tańdaý pánderin aýystyrýǵa bolmaıdy.

Sondaı-aq, bıyldan bastap erekshe bilim berý qajettiligi bar balalarǵa testileýge qosymsha 40 mınýt ýaqyt beriledi.

Onymen qosa, bul túlekter úshin sýretsiz, dıagrammasyz, shemasyz test suraqtary ázirlengen.