Bıyl Mańǵystaýda 12 aýyl ortalyqtan beriletin sý júıesine qosylady
«Mańǵystaýdyń sýmen qamtamasyz etý júıesin jáne ınjenerlik ınfraqurylymyn jańǵyrtyp, Aqtaý jáne Jańaózen qalalaryn damytý kerek. Aýyz sýdyń jetispeýi – turǵyndardy alańdatyp otyrǵan ótkir máseleniń biri. Sý tushytatyn zaýyttardyń qýaty álsiz bolǵandyqtan, qalalar men aýyldarda jaz kezinde sý belgili bir ýaqytta ǵana beriledi. Al, bıylǵy mamyr aıynda qala turǵyndary sý tasıtyn kóliktiń kezeginde turýǵa májbúr boldy. Mundaı jaǵdaıǵa shydap otyrýǵa bolmaıdy. 2025 jylǵa qaraı oblysta sýǵa degen suranys 260 myń tekshe metrge deıin ósýi múmkin. Men bes jyl ishinde óńirdegi barlyq qalalar men aýyldardy aýyz sýmen qamtamasyz etý jóninde mindet qoıyp otyrmyn. Ákimdik bul baǵyttaǵy jumysty bastap ketti. Meniń tapsyrmammen jyl aıaǵyna deıin 12 aýyl ortalyqtan beriletin sý júıesine qosylady. Óńirde 2025 jylǵa deıin sý tushytý jónindegi 9 joba, magıstraldi sý qubyryn salý jáne qaıta jańǵyrtý jónindegi 4 jobany júzege asyrý kózdelip otyr. Sonymen qatar, merzimi sozylyp bara jatqan jobalar da bar», - dedi Prezıdent.
Onyń aıtýynsha, Kendirli aýylyndaǵy sý tushytatyn zaýyttyń qurylysyn bastaý kerek.
33 jyl buryn paıdalanýǵa berilgen Astrahan – Mańǵystaý sý qubyry ábden tozǵan. Ony jańǵyrtý jáne keńeıtý jumystary óte baıaý júrip jatyr.
Úkimet jáne «Samuryq-Qazyna» qory barlyq jumystardy merziminde oryndaýǵa tıis.
«MAEK-Qazatompromnyń» qýatyn arttyrýǵa erekshe kóńil bólgen jón. Óńirdiń úzdiksiz damýyna jáne halyq sanynyń ósýine baılanysty ınjenerlik júıeni jańǵyrtý máselesi týyndap otyr. Qazir kommýnaldyq ınfraqurylymnyń shamasy jetpeı jatyr. Óńirge sý, jylý jáne elektr energııasyn negizinen «MAEK-Qazatomprom» kompanııasy beredi. Biraq, bul kásiporyndaǵy qural-jabdyqtardyń 80 paıyzynyń tozyǵy jetken. Buǵan deıin óńirge jumys saparymen kelgende kásiporyndy jańǵyrtý baǵdarlamasyn ázirleýdi tapsyrǵan edim. Úkimet ony júzege asyrýǵa qajetti qarjy kózderin qarastyrý kerek. Kópke sozbaı, jýyq arada jumysty bastaýymyz qajet», - deıdi Memleket basshysy.