Bıyl Mańǵystaý oblysynda eńbek zańnamasy 689 ret buzylǵan

AQTAÝ. QazAqparat - Bıyl Mańǵystaý oblysyndaǵy kásiporyndarda eńbek zańnamasyn buzýdyń 689 faktisi anyqtaldy. Bul týraly Qoǵamdyq kommýnıkatsııa ortalyǵynda ótken brıfıngide oblystyq Memlekettik eńbek ınspektsııasy basqarmasy basshysynyń mindetin atqarýshy Nuraly Baýlybaev málim etti, dep habarlaıdy QazAqparat tilshisi.

Onyń aıtýynsha, bıyl óńirdegi kásiporyndarǵa memlekettik eńbek ınspektorlary 332 tekserý jumysyn júrgizdi.

«Tekseris nátıjesinde jyl basynan beri 689 zań buzýshylyq anyqtaldy. Onyń 410-y eńbek qatynastaryna qatysty, 269-y qaýipsizdik jáne eńbekti qorǵaýǵa jáne taǵy 10-y halyqty jumyspen qamtý boıynsha. Memlekettik eńbek ınspektsııasy zań buzǵan kásiporyndarǵa 5,7 mln teńge kóleminde 37 ákimshilik aıyppul saldy», - dedi Nuraly Baýlybaev.

Sondaı-aq, bıyl oblys aýmaǵyndaǵy kásiporyndarda 31 jazataıym oqıǵa tirkelgen. Osyǵan oraı, basqarma arnaıy kommıssııa quryp, tekseris jumystaryn uıymdastyrdy.

«Mańǵystaý oblysynyń kásiporyndarynda barlyǵy 31 jazataıym oqıǵa tirkelip, 33 adam zardap shekken. Onyń 31-i aýyr jaǵdaıǵa tap bolsa, 2-ýi mert boldy. Bul kórsetkish 2020 jylmen salystyrǵanda 11,4% tómen», -dedi Nuraly Baýlybaev.

Aıta keteıik, jyl basynan beri aımaqtyń 57 kásipornynda QR Eńbek kodeksiniń sońǵy ózgeristeri boıynsha túsindirme jumystary júrgizildi. Alaıda keıbir kásiporyndar eńbek ınspektorynyń nusqamasymen kelispeı, jyl basynan beri 28 sot otyrysy ótti.